| 大家睇咗咁多年波，覺得邊個心口贊助商最經典？係當年曼聯三冠王嘅Sharp(利申19000)？利記嘅Carlsberg？皇馬六條煙時期嘅Siemens？無論你嘅答案係咩，喺不久嘅將來都好有可能會改變－－因為PornHub近期密謀成為一隊意甲球隊嘅心口贊助商。萬一事成，好快你哋就會見到11個男人心口掛住PornHub個招牌喺球場上追住個波波啦！ | |
| |
唔知係咪經營開呢啲網上成人短片平台嘅都好有社會責任感，所以ThisAV會自動Backup某大學流出嘅錄音，而PornHub就好致力關心運動發展。自從上屆世界杯期間，好多人將巴西被數7-1嘅半準決賽精華冠上「Young Brazilians get f**ked by entrie German soccer team」等等名義放上PornHub，搞到PornHub要喺官方Twitter以「我哋嘅公開羞辱(Public Humilation)類別已經冇位啦」為理由呼籲大家停止之後，PornHub就莫名地同足球界扯上關係。例如佢哋之後就試過成為英國University of Kent旗下足球隊「Rurherford Raiders」嘅心口贊助，不過好快就被校方以「完全不適當」為理由禁止。 | |
| |
而根據《Vice Sports》引述意大利報章《Corriere dello Sport》嘅報導，PornHub目前正向各大意甲球隊徵集計劃書，希望喺來年，即2016-17球季正式成為其中一隊嘅心口贊助商，不過目前就冇報導有冇球隊有意同佢哋合作。值得一提嘅係雖然意甲球隊嘅心口贊助費冇土豪英超咁過份(例如曼聯同雪佛蘭嘅交易係每季4700萬美金)，但班霸球隊如祖記喺上年同Fiat簽嘅都要每年1700萬美金，羅馬同Etihad Airways(同為曼城心口贊助)新簽嘅合約就係每年1400萬美金。換言之PornHub要成為贊助商，起碼都要掟返三五七百萬美出黎啦－－乜家陣搞咸網咁好賺嘅咩……？ | |
