Menclub

一路向沙咀道探索荃灣新酒吧

文：MenClub Mean娜　　圖：MenClub
POSTED ON November 13, 2015 7:00 pm

荃灣一帶要飲嘢，熟架步嘅都知楊屋道同愉景附近最多選擇，大部份荃灣友青衣友都去呢頭玩開。不過多人玩，座位自然難Book啲，設施又會易殘啲，你諗吓Happy Friday間間Bar都同你講Full晒，唱K時支咪又要壞壞地，真係要達哥上身咁講句︰「喊出嚟！（嗚哇～）」Hey～傻豬嚟嘅！想喺荃灣搵個靚場飲得放咋嘛～So Easy！跟我Mean娜嚟沙咀道啦！位於荃灣沙咀道嘅新酒吧M1，整體走型格路線，黑白為主嘅色Tone，配上流線形設計嘅Lighting，感覺非常時髦。


一踏入M1 Bar，就見到舞台、大螢幕以及點唱機，啱晒鍾意大展歌喉嘅巴絲打，加埋五光十色嘅射燈，企上去真係成粒巨星咁款！係差未有Banner同四面台咋！

你睇吓我唱得幾High～
M1 Bar裡面仲有個好大好Classy嘅吧枱，可以畀你一邊睇住bartender調配飲料，一邊同朋友細細聲咬耳仔又得，型型地一個人飲又得！得咗！M1酒吧，冇得彈！

嚟得酒吧，都係想飲得盡興，骰盅、啤牌當然唔少得啦！如果你唔啱玩，都唔使愁，行入少少仲有三部飛標機畀你掟。（聽講掟標時順便Yo女是常識吧，自己把握機會啦飛雲。）

哼！你唔係唔畀我贏呀嘛？
一大班Friend圍威喂，驚坐出面嘈親人，大可以入VIP房圍內玩，仲有一間獨立廁所，唔使出去同人爭，玩到拆天都冇事！

嚟得酒吧，唔通同你飲橙汁咩？講完環境當然要入正題同你講吓酒。基本嘅啤酒同各類高酒精濃度嘅Cocktail，M1 Bar都有。不過同班Friend飲嘢，都係志在玩吓，飲得高興就OK啦！生力清啤酒精含量只有 3.6度，雖然酒精濃度較低，但仍然保留獨特酒味，而且清新易入口，直情好飲到要去自己斟添！飲完唔怕脹肚又冇咁易肥，Fit住飲冇難度。

溫馨提示︰座落沙咀道嘅M1 Bar除咗畀你同Friend啤啤佢之外，仲經常會舉辦各種活動，嚟緊11月25及12月9日就會有個「M1 Bar K歌擂台戰」初賽，成功進入總決賽並得到冠軍嘅參賽者，就可以獲得8堂專業演唱技巧訓練，以及1年期合同。自問唱歌有返咁上下嘅巴打同絲打，真係可以報名試吓喎！詳情可以參考以下Poster。