精細的機械感

同男仔細個鐘意玩機械人嘅理由相近，我地就係沈迷於鐘錶世界嘅精密結構同機械運作。尤其係工作繁忙、秒秒鐘幾百萬上落嘅男士，更加需要一隻可以依賴嘅精確時計。試想像一隻數十毫米嘅錶盤當中，可以有幾百個部件同時運作，令錶面顯示嘅時間不受地深吸力、氣候、外界衝擊等等因素影響，時刻保持準確運行，如此精湛嘅工藝，令鐘錶成為一件充滿機械感嘅藝術傑作。(亦都因為呢個原因，我從來都唔認為 Apple Watch 可以衝擊傳統瑞士鐘錶業)

表現自身態度

男人好少帶飾物上身，西裝又以整齊筆挺之簡約風格為主，要從外觀上表現自己，腕錶就係最好嘅媒界。每一款錶代表唔同嘅人格個性，錶嘅形態、機械結構、品牌嘅歷史、形象信念，幾萬字嘅訊息透過一隻腕錶表達出嚟。如果你戴錶無以上考慮，則腕錶對你嚟講只係一件貨物，戴隻 PP 於身上亦表達唔到任何態度。

建立關係

一堆 Gents 傾偈，話題來來去去都係嗰幾樣，而錶必然係其中一項。大概係與生俱來嘅本能，一班男士聚埋一齊就會講吓大家手上戴啲錶、最近有咩新品，各自有咩收藏等等，呢啲就係所謂啲男士品味。即使大家係首次見面，錶都可以幫助雙方展開話題，熟又係講錶，唔熟又係講錶，你話幾重要呢。

保值儲錢

以好現實嘅角度睇，玩錶嘅其中一個好處就係二手市場嘅價格唔錯，Rolex多年來咁受歡迎都係呢個原因。有啲玩家甚至會儲啲珍稀限量品以作投資之用，坊間有好多文章討論各大品牌嘅升值潛力，有哂數字為證，所言非虛，至於應該買邊隻投資，於此不作詳細論述。

健康奢侈品

相比起煙、酒，玩錶必然係比較健康嘅選擇。雖然我係醇酒編輯，但我絕對講唔出飲酒好健康呢類說話。戴錶、儲錶始終於人體無任何直接影響，你最多會為靚錶節衣縮食，加倍工作，咁呢啲都係個人選擇，唔應該怪落隻錶度啦。