我做學生嗰陣壓力都好大，屋企無錢，家人不和，成績又差，好彩有堆兄弟老友一齊捱過，今日先有幸響MenClub寫文俾大家睇。人生就係咁，有高有低，無論你係天才定廢青，都有沮喪位，所以人，係需要群體生活，互相扶持，先能夠走落去。

MenClub係一個網上平台，會同你講女、車、酒、錶、男人玩意，但我 (個人) 更加想MenClub同巴打們做到朋友，大家分享吓自己嘅生活，又學吓新野，一齊 To Be a Better Man。如果下次有活動，再飲返杯吹吓水 OK?

講返電影，太經典嗰啲《The Shawshank Redemption》、《A Beautiful Mind》勵志嘢唔駛我講啦，今次同大家講吓近年嘅熱血作品 :

殺破狼2

我心目中2015年年度港產片，由鄭保瑞執導，同宇宙最強套《殺破狼》係完全唔同嘅故事嚟。呢集有3條主線，刑警吳京因查案誤墮泰國監獄、獄卒Tony Jaa要救有絕症嘅小女兒，古天樂要換細佬個心臟續命，3個陷入險境嘅人，去到最後一刻仍然奮力堅持，因為捱過咗難關就會有希望。

Kano

Sorry，係老土熱血運動片，仲要係3個鐘嗰種，不過睇咗你唔會後悔。一隊鄉村雜牌軍、魚腩代表台灣征戰日本棒球界嘅經典主線，受到魔鬼教練嘅非人訓練，呢班後生仔終於初嚐勝利滋味，最後仲踏足埋屬於夢想嘅地方「甲子園」，好熱血，男人老狗都睇到喊哂口。

激戰

張家輝、彭于晏爆「肌」嘅一套電影，點解揀佢係因為張家輝嘅設定 : 一個失敗嘅中年漢。拳王如賤輝都有做錯事嘅時候，一樣要馬死落地行，教師奶跳開心舞，但人生嘅際遇就係咁奇妙，有日你會遇到好似彭于晏咁嘅癲佬，再次搵返失落已久嘅自己。

Real Steel

嘩呢套不得了，史提芬史匹堡 + Hugh Jackman嘅高科技型格版《激戰》。主角Huge Jackman又係失意中年漢，為咗自己個仔Max決心做返個打得嘅拳手，擂台上兩部機械人拳來拳往，爆炸性、衝擊力十足，熱血到極。

Escape Plan

5 套之中最「冷靜」嘅電影，故事講逃獄專家史泰龍 (係，大家好熟嗰位) 俾人呃咗入去一個超高科技、保安嚴密嘅先進監倉入面。佢對呢度一無所知，亦唔知自己點解入咗黎，只有成功逃獄先可以搵到答案，睇到最後，結局都幾出人意表架。