日本嘅木村飲料專出奇怪口味嘅碳酸飲品，例如咖哩味波子汽水、芥末味波子汽水……而最近佢終於正路返少少，推出大眾都容易接受嘅櫻花可樂（斷估佢都係為應景，之後會繼續出怪味飲品）。

木村飲料嘅行銷總部鹽澤小姐就話，櫻花可樂係以櫻花為概念嘅淡粉紅色可樂，用上「日本櫻花濃縮液」嚟造出美麗嘅櫻花色澤。佢表示，點解會用「日本櫻花濃縮液」而唔用最常用嘅「櫻花花葉濃縮液」呢？係因為「日本櫻花濃縮液」貴就貴咗啲，但櫻花味更出，而且據聞有效防止老化，所以就決定用佢。