同二次元人物結婚可能係某部分毒男嘅終極夢想！當中萌爆嘅初音未來極有可能係毒男心目中嘅理想妻子。雖然話就話事實上邊有可能同二次元人物結婚，但如果張結婚證書都印住「你老婆」個樣，會唔會多多少少都滿足到自己嘅FF呢？

繼日本推出多款卡通動漫結婚證書（例如美少女戰士、Hello Kitty、Little Twins Star……），今次又有新款式登場～登登登凳～就係男人們爆愛嘅初音未來！就算你冇結婚對象都唔怕，買咗張初音結婚證書咪當同初音結咗婚囉！恭喜晒喎！

初音結婚證書分粉紅同藍色，一組兩張，一張申請用，一張紀念用！兩組結婚證書都係由KEI老師一手繪製。價錢大約係3900日元。