| 如果你鍾意車，你應該都知無論車廠公佈嘅概念車講到有幾天花龍鳳，到投產嘅時候新設計總有各種理由被棄用，到最後又係得一部似曾相識嘅「新車」。連官方公佈嘅都係咁，更加唔好提其他設計師自己嘅創作——除非你可以好似Mehmet Doruk Erdem咁畫出一部打動到Mark "Makr" Atkinson嘅概念啦，咁就唔同玩法啦！ | |
| |
| 成件事係咁嘅，話說2015年嘅時候，土耳其設計師Mehmet Doruk Erdem就喺自己嘅Behance網站到放坐一部叫「ALPHA」嘅鹽灘加速賽電單車(即係喺一大片平坦鹽湖上面追求最高速嘅賽事)，即係上面呢部。因為設計得太靚，所以就被人拎咗上社交網站傳黎傳去，傳下傳下就傳到去加拿大汽車專家Mark Atkinson到，Mark一見到呢個設計就覺得驚為天人，於是就決定聯絡Mehmet諗住一齊整出黎。 | |
| 點知Mehmet就冇覆到佢，失望嘅Mark就唯有自己拎部BMW K75黎開始改裝，但整到一大半，佢始終都覺得用人哋嘅設計黎整好似唔係幾好，於是改用Instagram再次聯絡Mehmet，今次Mehmet就覆啦，原來佢因為收到太多人話要將佢嘅設計成真嘅「空頭支票」，於是乾脆已讀不回。但見到Mark嘅進度，佢就決定加入團隊。最後就得出呢部完整嘅「ALPHA」啦！ | |
| 最後佢哋為「ALPHA」加上Turbo、一個全新嘅變速器、新嘅制動以及轉向部件，當你考慮到原本部K75嘅樣，好明顯成個車架都係新嘅。而且一切——甚至入面嘅一粒螺絲，都係由Mark一手一腳包辦。呢架嘢賣就應該冇得賣架啦，但Mark就話今次嘅經驗令佢想繼續挑戰其他概念車喎，我哋等你呀！ | |
