拍寫真係唔少日本女星進入娛樂圈嘅契機、跳板，所以當佢哋累積到足夠人氣之後，唔少都會直接「寫真引退」，轉去做演員或者節目藝人。不過近年就興起一陣「回鍋熱」，唔少於2010年代出道、已經遠離寫真多年嘅女星，都襯住自己出道十年或者年滿30歲，再次推出個人寫真，當中更有唔少好耐冇同大家介紹過嘅「熟面孔」。好似呢位「筧美和子」，一眾老MenClub讀者應該都有印象啦！

3月啱啱滿30歲嘅「筧美和子」最早於2011年（即係17歲左右）就被星探發掘而加入寫真界，到我哋開始「深夜系列」時正值其人氣最鼎盛時期，當年我哋每朝Post嘅「Morning Girl」亦多次用過佢啲相。不過後來佢就將事業重心放喺演員工作，寫真產量亦隨之大減，雖然偶爾都仲會於雜誌寫真見到佢，但要數到個人寫真集，於2016年後就再冇新作。

直到今年2月，佢宣佈會推出新寫真集《ゴーみぃー》，並多次於《週刊Playboy》發佈寫真照作宣傳。據佢於訪問中表示，佢認為寫真係佢嘅事業「原點」，所以希望於30歲時再次推出寫真。不過由於年輕時拍得太多，多到佢覺得鏡頭下嘅佢已經唔係自己，所以新寫真就刻意展現自己最貼近現實生活嘅一面，亦因為咁，所以寫真集內嘅照片都儘量避免P圖，仔細睇嘅話，皮膚上嘅小皺紋及皮膚下嘅血管都清昕可見，亦冇為寫真集特意瘦身，保留最自然嘅自己。

IG：miwakokakei