為咗研究外貌對於學業成績是否會產生「歧視性」影響,來自瑞典Lund大學嘅研究生 Adrian Mehic收集當地另一間大學前後五個年次,共307名工程系學生的外貌資料及成績。學生們上嘅課程內容完全一樣,唯一分別係其中兩個年次嘅學生,有部份課堂因為疫情關係而改為網上授課,而學校並無硬性規定學生一定要開Cam。Adrian相信「隔住個mon」或者會消除靚仔靚女們在學業上嘅優勢。另外佢亦搵黎74個受訪者去評定學生們的外貌吸引度。
首先,佢發現靚仔靚女們的確享有「外貌紅利」,喺管理學、經濟學等「非量化課程」之中,學生嘅外貌吸引度與最終成績成正比。有趣嘅係,佢亦發現於「可量化課程」,如數學、物理等,學生嘅外貌與成績並不相關。Adrian指出,「非量化課程」大多包含 group project 及 presentation,當中涉及與同學及教授嘅互動,而樣靚的確會帶來優勢;反觀數學、物理嘅評分大多黎至筆試,外表帶黎嘅優勢就變得唔明顯。