成世人流流長，總會遇到幾個衰上司。跟著個衰上司工作，就算本來都幾鍾意份工，都可以因為一粒老鼠屎而慘被染污。要踢走衰上司是困難的事，大部份員工只能選擇離開，如果你都遇到有以下行為的上司，就祝你好運了。

一言堂

身為上司，無疑能力比下屬強，但每個人都有其才能，上司亦未必張張刀都一樣利，下屬的意見或睇法有時是好過上司的。但衰上司最怕失威，在下屬面前承認對方的想法比自己好，實在難落台，因此，他們會以上司官威壓下屬，一定要下屬聽自己講，最後苦了下屬之餘，件事又做得唔好，是雙輸。

勁卸膞

下屬做錯，上司一定責無旁貸，之所以球隊輸波，要炒都是炒教練。但衰上司不但不會為下屬擔當，甚至想盡方法卸責，將錯事全卸在下屬身上，讓自己脫身。就算冇錯事出現，衰上司都會將工作盡量卸給下屬去做，下屬晚晚OT，衰上司則一早放工happy hour。

欠領導

上司其中一項主要工作就是導團隊工作，讓每位員工發揮所長，做好每項工作。但衰上司欠缺領導才能，不會做統籌，不會教導員工如何認付問題，令員工無所適從，遇到挑戰也只得自己摸著石頭過河去解決。

冇交帶

唔識帶隊都算，作為稱職員工，大不了自己搞掂，最敝衰上司有時連交帶都冇，接到工作自己唔做，又唔交俾下屬去做，等到其他部門同事走來追工作進度，下屬被問到口啞啞，然後無啦啦要加班做！

阻上位

要幫手補鑊都算，有料員工有傑出的工作表現，理應值得被提升，成為上司領導團隊，但衰上司就最怕叻員工上位，頂替了自己的位置，但自己又沒有再升一級，咁咪無位企？要維持上司的現狀，唯有唔俾機會下屬上啦！