每隔一段時間，網上就流傳有新娘子要求親友蒞臨飲宴時，要做足人情數目，如果自問沒有能力俾得足，不如不到，以免新人蝕錢埋單。這些刻薄要求只會惹來網民圍插，如果新人擺酒宴請親朋，真係想慳錢，不如靠自己好過求人啦。

同事多請無妨

情侶結婚，如果雙方都在大公司工作，或經常與不同部門同事合作，人脈應該有番咁上下廣闊，結婚擺酒此等喜事，在公在私也實在要和同事分享，好讓日後合作時更暢順。但大部份同事其實屬點頭之交，請飲純粹禮貌，對方都未必真係想來慶賀，因此，同事收帖多半會選擇只做人情而不來飲宴，收帖唔來公價人情大約300元，這300元可真是淨袋，十分化算！

揀大時大節擺酒

物價上漲，家陣無論酒店或酒樓擺酒，見得下人大概一萬元一席，一席十二位，每位賓客俾人情公價800元都要蝕，仲未計加一。換句說話，擺酒請客，除非對方好好朋友，出手疏爽，否則係請多一個就蝕多一個。所以，選日子擺酒時，不妨揀選如情人節、聖誕節、母親節等節日，既可增添浪漫氣氛，又可給不太熟絡但又不得不請的同事、朋友一個不能來的好藉口，少點不相熟的親友來飲，但人情則可以照袋呢。

老細上司不能不請

同事朋友俾人情，俾盡都係公價加友情價，多極有限，要從人情賺錢，就必須多請比自己高級的主管、上司、老細。作為上司，面子份上，出手一定要俾普通同事多，這是上司應有的風範，老細級別更加出手闊綽，就算唔黎都要俾四位數才似樣啦。

無魚翅夠環保

以往擺婚宴請客，必須要有魚翅才顯得主人家有禮貌，但今時今日環保二字當頭，無翅婚宴才是大勢所趨。無翅不但有助保環海洋生物，價格也一定比有翅婚宴低，但賓客俾人情則不會因為有翅無翅而調整，變相新人可減輕擺酒成本。