呢個時候，全城彌漫著濃烈的火藥味，人心撕裂前所未見，精神難以集中...今日不欲再說沉重的話，只想分享輕鬆一點的話題，那是一個發生在20年前關於利物浦的笑話。

法國左閘

話說1999年11月，一個存心整蠱的網民無厘頭，在阿仙奴論壇發發一則「轉會消息」，然後離奇獲得整個英國的傳媒關注，連利物浦粉絲也信以為真，事件主角叫Didier Baptiste，據說他是效力「摩納哥」的左閘，亦是前法國U21代表。問題是，世界上根本無呢個人，紅軍史上也沒簽過呢個人。

世界新聞報

笑話不是老作，Baptiste的的確確是左閘，但卻是天空電視《Dream Team》劇集的虛構角色，人家由古代穿越到現代，他卻由劇集穿越到現實。2011年7月壽終正寢的《世界新聞報》，一度是英國最強小報，當年與傳統大報《泰晤士報》等，均有報道呢單流到出水的假新聞。

收費熱線

點解嘅？點解嘅？點解嘅？假新聞原來今日先有，但當年發生的原因大概同資訊唔流通有關。互聯網在20年前仍處於起步期，維基百科面世的一年是2001年，Facebook於2004年出現，YouTube誕生的年份是2005年，可想而知，一個人要獲得真相也不容易。當年，英國記者要花60便士，致電官方熱線查詢真偽，惟唔係人人會咁做。

兵工廠介入

說回劇集發展下去，Baptiste正在與Harchester United對話，告知對方「收到法國名帥的斟介」，當被問到是侯利亞抑或雲加時，他只是一笑置之。隨後《世界新聞報》披露「獨家」猛料，紅軍將以350萬鎊轉會費簽下「假人」，更聲稱與兵工廠拗手瓜，撰文者Mike Dunn寫道：「他是紅軍防線的完美新援。」吓？真係嚇一跳，然後得啖笑。

煲劇投入

三人成虎，流料散播之後，利記將帥信到十足十，直至《Dream Team》發言人現身否認，證實「有人煲劇太投入」，以致真假難分。弔詭的是，Baptiste在劇集中也拒絕利物浦同阿仙奴邀請，講心唔講金，留隊上陣44場，射入5球，卻在季尾因打假波而離隊。呢個左閘在護級大戰故意操刀12碼宴客，結果被炒魷魚，佢會後悔無加盟利記嗎？嗱，資訊流通真係好事，也是香港最強優勢，否則我們早已被CCTVB洗腦了。