大家嘅生活越黎越依賴互聯網及電子器材，亦代表大家有越黎越多密碼要記，忘記密碼嘅情況亦越黎越常見。如果你唔記得嘅係Email密碼，大不了就撞多幾次、花啲時間搞重新驗證就得，但如果你好似來自美國三藩市嘅程式員Stefan Thomas咁，係唔記得咗自己個Bitcoin密碼、而你個Bitcoin銀包入面仲要有市值近2億港紙嘅Bitcoin，咁你就真係有排煩啦！

圖片：截圖自New York Times

件事係咁嘅，Stefan Thomas十年曾經製作一條解釋加密貨幣運作原理嘅動畫影片「What is Bitcoin？」，而獲得一名Bitcoin狂熱者「打賞」7,002個Bitcoin，呢啲Bitcoin被放入一個電子錢包，打開呢個電子錢包就需要用到一個名為「Ironkey」嘅加密USB，而呢隻「Ironkey」本身又要有密碼先可以打開——而Stefan就係唔記得咗個「Ironkey」密碼。

事實上喺收到啲Bitcoin嘅同時，Stefan就已經將個Ironkey密碼用張紙寫低，但第一年佢張紙就已經唔見咗，於是接下來呢十年，Stefan用咗無數時間去回想自己究竟用咗個咩密碼，但試咗8個常用密碼之後都唔成功。而由於Ironkey最多只能輸入十次錯誤密碼，換言之Stefan目前只剩兩次機會，否則就要同入面嗰7,002個、目前總值超過2億港紙嘅Bitcoin講永別。

報導於《New York Times》刊出之後，史丹福大學互聯網天文台嘅網絡安全專家Alex Stamos向Stefan提議，能夠於6個月內幫佢破解Ironkey密碼，條件係要Stefan事後要支付其Bitcoin財富嘅10%作為酬勞。但Stefan就決定暫時唔理啲Bitcoin，「過去就讓它過去」喎。

由於Bitcoin嘅「無銀行、無公司」特性，所以用戶嘅密碼只有用戶本人知道，亦無官方提供嘅「尋回密碼」、「重設密碼」等服務。據加密貨幣分析公司Chainalysis指，目前市面上存在嘅1,850萬個Bitcoin中，估有約20%似乎係「遺失或被鎖於電子錢包之中」，總值近1,400億美金。