唔知咁多位有留意潮流嘅大家，有冇發現呢幾年嚟除咗一啲本身會出 Slip-On 鞋款嘅公司例如 Vans 同埋 Toms 之外，一啲其他品牌都有推出全新設計嘅「懶佬鞋」鞋款，就好似現今兩大運動鞋巨頭： Adidas 同 Nike 咁，呢幾年嚟都出過「懶佬鞋」鞋款。

Nike 就喺 2014 年曾經推出以當時大熱鞋款 Roshe Run 作構思再重新設計而成嘅 Nike Roshe Run Slip On，但好可惜地而家已經無再推出新配色，我個人就好喜歡呢個 Slip-On 款嘅設計，另外 Nike SB 呢條滑板支線亦有將旗下 Zoom Stefan Janoski 鞋款改成 Slip-On 鞋款推出。

而另外 Adidas 亦有以經典鞋款 SuperStar 重新構築而生嘅 adidas Superstar Slip-on 鞋款，相信呢一對鞋嘅話喺香港比較容易見到人著用，而且各大門市亦 Keep 住有賣，叫做好成功嘅例子。

而今日嘅主角經典波鞋品牌 Converse 雖然亦都有推出過 Slip-On 鞋款，但好多款都係將旗下嘅休閒鞋款抆走哂鞋帶就叫出過一對新 Slip-On 款。

今次呢對就唔同啦，首先作為 Addict 支線出品，加上 Vibram 防滑大底，品質上有保證，其二就係呢對 One Star Loafer 有名你叫，鞋型係參考 Loafer 皮鞋鞋型，喺鞋面上額外縫上多一條搭帶，而且車有經典 One Star 星章，另外鞋頭亦有尖頭效果，夠哂 Smart Casual。

至於呢對鞋暫時就只有日本方面有發售消息，將會喺 11月10日 發售，而價錢係 22,000 Yen，想擁有如此特別嘅 Slip-On 鞋的話好搵定朋友仔幫幫手啦。