微軟喺今年嘅「E3 2018」中曾經透露正籌備全新雲端遊戲串流服務項目，微軟噚日正式公布項目名稱為「Project xCloud」，並正進行內部測試，最快會喺2019年對外開放測試。「Project xCloud」可以支援用家以Xbox手掣及手機玩各類PC或Xbox平台遊戲，將來見到有人喺地鐵拎住個手掣打機唔駛太驚訝。

「Project xCloud」係由Azure團隊合作打造，預計雲端遊戲串流服務可以喺全球超過54個Azure服務提供地區、涵蓋140個國家中運作使用。今次微軟嘅「Project xCloud」係透過雲端串流方式提供遊戲，平台可以對應支援與Xbox無線控制器連接手機、平板電腦等裝置使用，同時微軟亦會測試完全使用觸控嘅遊戲模式，令使用者可以透過虛擬按鈕玩各類PC或Xbox平台遊戲。

目前微軟已經將Xbox One平台上所發行嘅超過3000款遊戲移轉至雲端平台，希望能夠建立龐大嘅遊戲體驗規模，不過微軟目前尚未公布「Project xCloud」嘅具體營運模式，以及相關收費細節，想用就要再等一等喇！

來源：Microsoft