小米8又嚟喇！繼小米喺今年6月發布咗「小米8」、「小米8 SE」及「小米8 探索版」共3部機後，噚日再喺香港發布咗兩部新機，分別係「小米8 Pro」及「小米8 Lite」。其中「小米8 Pro (螢幕指紋版)」採用咗壓感螢幕指紋辨識，外型仲同早前發布嘅「小米8 探索版」一樣咁濟。

先講講呢部透明機背嘅「小米8 Pro (螢幕指紋版)」，有睇過我哋早前報道都會知道同呢部機孖生一樣嘅「小米8 探索版」都係採用透明機背，而機背仲可以睇穿機內電路版，但早前小米手機產品市場總監臧智淵已經承認咗電路版只係裝飾，而「小米8 Pro」機背嘅電路版亦都唔例外，都係假嘅。

「小米8 Pro」採用咗全球首款嘅壓感螢幕指紋辨識系統，即係靠個Mon就可以用指紋解鎖，而由於壓感附加嘅振動回饋機制，令解鎖速度提升29%，成功率亦提升8.8%。作為Pro機型，「小米8 Pro」採用咗高通Snapdragon 845 旗艦行動平台及8GB記憶體與128GB容量，6.21吋AMOLED全螢幕。

相機方面，「小米8 Pro」採用咗12MP廣角鏡頭(f/1.8) + 12MP長焦鏡頭(f/2.4)嘅雙鏡頭系統，前置鏡頭為20MP；而拍片則支援4K (30fps)、1080p(30, 120, 240fps)及720p (30, 240fps)影片拍攝。「小米8 Pro」售價港幣3,999元，今日開始發售。

另一部機為「小米8 Lite」，佢喺中國有「小米8 青春版」之稱，機身有夢幻藍、暮光金及深空灰3隻漸變顏色，配色的確非常Young。

由於「小米8 Lite」Target年輕人，所以自拍鏡頭方面都特別重視。佢嘅前置相機係首次喺同價位手機中用上Sony旗艦級2400萬像素鏡頭IMX576，呢個係Sony目前像素最大、解像度最高嘅手機前置相機傳感器，可以支援像素四合一技術，進一步提升暗光自拍水準。而後置鏡頭採用咗12MP + 500MP AI雙鏡頭。

「小米8 Lite」採用高通Snapdragon 660行動平台，及6GB記憶體與128GB容量配置，售價為港幣2,299元，同為今日正式發售。