無人機大廠 DJI 繼去年推出 Osmo Pocket 後，今日正式對外發布全新運動相機 Osmo Action，佢嘅規格及配置與日前流出資料都相當脗合。而 Osmo Action 主要賣點就係配有前後雙彩色 LCD 螢幕，以及電子圖像穩定技術 RockSteady。

呢部 Osmo Action 被多個外國 YouTuber 認為係 GoPro Killer，因為佢外型與 GoPro 運動相機 Hero7 外型、定位、功能都非常相似。不過 Osmo Action 配有前後雙彩色 LCD 螢幕，包括2.25吋後置觸控螢幕具有防水防指痕塗層，及1.4吋前置彩色螢幕，而前置螢幕就令到喜歡自拍嘅用家更加得心應手，因為用家可以透過前置螢幕睇清楚相機所拍攝嘅畫面。有無 Out Fo 就未必睇到，不就一定知道自己有無入鏡！

雖然 Osmo Action 無配備任何雲台，不過佢內置嘅電子圖像穩定技術 RockSteady 可以帶嚟類似機械三軸防震嘅效果，RockSteady 透過獨特濾波演算法可以喺消減晃動時保留相機嘅轉向運動，令影片畫面依然流暢。經過筆者嘅短暫測試後認為 Osmo Action 嘅內置防震技術的確比 GoPro Hero7 優勝。

鏡頭方面，Osmo Action 搭載1/2.3吋傳感器，最高可以拍攝100Mbps嘅4K/60fps影片及1200萬像素照片。此外，Osmo Action 採用非球面設計嘅廣角鏡頭，除咗畫面高清廣闊，仲可以有效減輕畫面變型，令拍攝嘅圖像更真實。

Osmo Action 單機可以連續錄製4K/60fps影片(開啟 RockSteady 增穩功能)達63分鐘；而拍攝1080p/30fps影片(關閉 RockSteady 增穩功能)最長可達135分鐘。Osmo Action 售價為港幣2,999元，即日可以喺 DJI Store 及 DJI 香港旗艦店購買，而5月22日起可以喺DJI授權分銷商及零售商購買。