NASA (美國太空總署)重返月球計劃「Artemis」好可能被延後喇，因為 NASA 目前正建造前往月球嘅火箭，可能因太空發射系統 (SLS)再一次超出預算而被推遲。今次超出預算嘅消息嚟自美國政府問責局 (GAO)嘅一份報告，而 NASA 可能無辦法喺2020年6月期限前完成 SLS 項目，要等到2021年6月先可以完成首次飛行。

嚟自 GAO 嘅報告用以審查 NASA 為太空探索開發嘅硬件，而最新一份評估報告係針對 NASA 嘅 SLS 開發計劃時間表，及成本超支問題。報告指出，NASA 可能無辦法喺2020年6月最後期限前完成 SLS 任務，SLS 可能要等到2021年6月先可以完成首次飛行，而 SLS 項目成本實際上已經接近18億美元；另一「獵戶座」(Orion)載人太空艙項目，成本預計亦會增加。

據了解，SLS 及 Orion 項目係 NASA 重返月球嘅重要硬件組成部分，亦係 NASA 最新登月計劃「Artemis」一部分，而 NASA 人類探索副局長 William Gerstenmaier 亦回應 GAO 報告指，SLS 及 Orion 係有史以來最複雜嘅硬件項目之一。為確保 NASA 能夠喺2024年前重返月球，NASA 局長 Jim Bridenstine 正為項目加速向國會尋求資金，除咗 NASA 年度預算外，仲需要額外200至300億美元。

來源：The Verge