由科技大亨 Elon Musk 所創立嘅太空科技公司 SpaceX，將於今日進行「Falcon Heavy (獵鷹重型)」火箭第三次升空任務，不過今次「Falcon Heavy」嘅任務比較特別，除咗運載咗24枚唔同用途衛星外，仲另外攜帶152位先人嘅骨灰，當中仲包括咗日本職棒全明星球員 Masaru Tomita 嘅骨灰。

太空科技公司 SpaceX 將會喺美國當地時間24日晚上發射「Falcon Heavy」，而提供太空殯葬服務嘅 Celestis DNA 公司今次就委託咗 SpaceX 將先人骨灰送上太空。今次升空任務由「Falcon Heavy」火箭負責，而先人骨灰會被放置喺一個金屬儲存囊內，而儲存囊外殼會附有先人相關訊息，當作太空墓碑。

雖然係上太空，但家屬只需支付最多$5,000美元(即$39,000港元)，就可以將先人骨灰送上太空，比起香港一個幾十萬都未必買到嘅骨灰龕位，似乎送上太空都唔係一個壞選擇。

今次嘅升空任務名為 Heritage Flight，「Falcon Heavy」火箭會攜帶152位先人骨灰上太空，當中包括咗日本職棒全明星球員 Masaru Tomita、曾發表科幻小說及技術科學論文嘅 Marj Kreuger，亦有美國太空人 Bill Pogue，佢曾經喺1969年阿波羅11號飛船任務中提供支援，後來喺國際太空站上創出長達84天嘅飛行記錄。

來源：Cnet