兩個幾月前東京車展嘅特別版Tomica，唔少人都左托右托，搵人幫手喺會場買返香港，有人捷足先登，搵到採訪車展嘅香港記者幫手，滿載而歸。

轉個頭，Tomica又宣布，喺1月15至17號，推出東京車展版Nismo R34 GT-R Z-tune Proto.，呢部1:62嘅車仔，除咗大多數Tomica都有嘅「彈彈」懸掛功能同可以左右開門之外，車身拉花極之精細，尤其係腰線接近尾部嘅位置，紅、黑直條變成碎片狀，另外，A柱對落位置亦有Z2同GT-R等熟悉「招牌」Logo，左邊尾泵近尾燈亦有NISMO Z-tune字章，咁細部車搞咁多花臣，都係收你800 yen，如果畀在我好似MenClub駐日專員北川住喺東京，一定晨咁早仆入去幕張排隊啦。

另外，Tomica亦會喺東京改裝車展，率先發售Dream Tomica頭文字D高橋兄弟套裝，包括高橋涼介嘅FD3S RX-7同高橋啓介嘅FD3S RX-7 Project D仕樣，成set 1500 yen，就咁睇相，好似冇部Nismo R34 GT-R Z-tune Proto.咁靚仔。不過，去到冇理由唔買囉！如果唔啱心水，送畀啲friend嘅小朋友，放喺Tomica停車場做「碰碰車」都好吖。