- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
Tony 年齡:40歲 職業:任職教育機構 強積金投資:超過10年投資股票經驗,對強積金同樣採取投機策略。 現有強積金近70萬元及100萬元儲蓄,想知點樣調整強積金投資組合去配合自己嘅需要。 | |
Tony玩咗股票十年,但都慨歎好難把握升跌timing | |
Tony有次喺投資講座中遇到Alvin,Tony無晒心機話啲股票愈來愈難「炒」,有時好彩買中啲消息股,又把握唔到幾時升跌,已經多次「贏粒糖,輸間廠」。 Tony話,「炒」強積金仲難,因為個市會俾好多因素影響,幾時「入」同「出」呢?真係高難度。 Alvin絕對認同Tony所講嘅「難炒」,尤其係強積金,原因係Tony錯誤咁,將強積金呢類長線投資當股票嚟短炒。 | |
強積金投資≠股票買賣 聽吓Alvin點解釋啦! Alvin解釋,強積金基金嘅買賣,有別於股票買賣,前者係以「未知價」方式進行,即係話:基金嘅交易價格,要等交易日收市後,根據基金淨資產值嚟釐定,就係因為咁,計劃成員唔能夠以指定價格沽出或買入基金單位。 所以呢,Tony唔應該,亦都無可能每分每秒去捕捉市場走勢去炒賣強積金。仲有啊,強積金係長線投資,投資期有成三、四十年,Tony更加唔應該單憑個別基金短期嘅價格波動,貿然咁換馬。 | |
善用收費比較平台及基金便覽 要了解個別強積金基金嘅詳情,Alvin建議Tony可先瀏覽積金局網站,佢哋嘅資料好齊,尤其係收費比較平台,唔單止顯示晒所有強積金基金的收費同年率化回報,計劃成員仲可以就個別強積金基金嘅收費,作出比較同埋download佢哋嘅基金便覽。 | |
收費比較平台齊集強積金基金嘅收費資料 | |
另外,法例規定受託人必須為每隻成分基金編製基金便覽,除咗可透過積金局或受託人網站下載,受託人亦須每年最少發送兩份基金便覽俾計劃成員參考。基金便覽載有個別基金的投資目標、淨資產值、推出日期、資產分配、十大資產組合、基金表現,同埋基金經理對市場回顧,以及市場展望嘅綜合意見等詳盡資料。不過,Alvin提醒Tony,基金往績僅供參考,唔代表將來嘅表現。Tony睇過其中一份基金便覽,覺得資料非常詳盡,啱晒佢呢類鍾意分析嘅投資者。 | |
基金便覽載有個別強積基金嘅詳盡資料 | |
檢討強積金及其他退休投資 Tony聽完Alvin講解後,話係時候重新檢討強積金投資組合,佢請教Alvin,邊種強積金基金比較啱佢。Alvin話,強積金只係退休儲備嘅其中一部分,喺考慮整個退休組合嘅風險同配置時,應該要考慮埋強積金同其他為退休而準備嘅資產。 Tony距離退休仲有20多年,加上有近70萬強積金同100萬儲蓄,收入又夠穩定,初步分析,佢承受風險能力相對較高,所以佢可以考慮選擇股票比例較高嘅強積金基金。至於佢嘅其他退休投資,就可以有較高比例嘅股票類投資,其餘係債券及現金類別。 | |
積金局網頁嘅基金便覽,資料非常詳細,啱晒好似Tony呢類鍾意分析嘅投資者 | |
總括而言,強積金投資係其中一項為退休準備嘅長線投資,所以計劃成員選擇啱自己嘅強積金基金之前,一定要多了解同比較,積金局網站入面除咗有剛才提到嘅「收費比較平台」同埋詳列基金資料嘅「基金便覽」之外,仲有好多有用嘅參考資料。咁有用嘅網頁仲唔快啲bookmark? | |
林昶恆 (Alvin) |