Nokia擋子彈已經唔係新聞，3310嘅硬淨程度更加令佢被封為不死神機，而最近同門師弟Nokia Lumia 920亦不甘示弱，一招心口碎大石，喺危牆之下救機主死過返生！

事發喺上星期，話說甘肅省蘭州市一幅地盤圍牆突然倒塌，即時活埋路人，事件導致2死9傷，而事主好在反應快用手機擋一擋先執返條命仔，換咗係其他牌子，可能冇得同佢做訪問。今次用被Nokia手機救命嘅事主話佢當時自然反應舉起手保護個頭，而手機就幫佢擋住咗跌落嚟嘅瓦礫，所以佢只係屬於輕傷。至於救佢一命嘅Nokia，只係個芒爛咗少少，其他功能一切正常，硬淨到你唔信。

歷史上有唔少神機都擋過字彈，當中有唔少個案都係Nokia出品，有啲更加中完槍之後仲可以繼續用，但原來其他品子手機都一樣頂得兩下。

Nokia 3310

被譽為地上最強嘅3310，咁多年來王考地位仍然屹立不倒，喺世界各地已經拯救過無數生命，甚至進可攻、退可守。近年最經典一單就係舊年佔中期間，有傳3310硬食子彈之後壽終正寢。

Nokia Lumia 520

一名巴西警察撞破一單爆竊案時，被劫匪連開兩槍，第一槍應該係被Nokia力場影響而打唔中，而另一槍雖然打中，但仍有Nokia金身護體令事主分毫無傷。

HTC Evo 3D

今次擋子彈發生喺美國一次劫案，事主心口中槍後輕傷，全靠部HTC Evo 3D幫佢吸收咗子彈嘅大部份衝力。其實同系嘅Evo喺2011年亦有擋子彈經驗，所以話唔定防彈先係HTC手機嘅主要功能。

BlackBerry

事件好普通，女事主被男友意外開槍射中，然後褲袋入面嘅手機擋住子彈。但重點係BlackBerry喺2009年曾經拍咗個廣告，係用黑莓做子彈射穿蘋果，個廣告想表達乜嘢？心照啦。