- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
特別鳴謝:MenClub讀者「法國賭神皮亞.卡箱」借出CASIO S100 攝影:MenClub Ricky 手機咁方便,裡面乜嘢功能都有齊,好多時要計啲生活上簡單嘅加減乘除數,都已改用手機嘅計算機功能,好耐冇掂過屋企部計數機。 「喂!你講你好喇,我仲日日篤住部計數機,屋企一部,公司一部,二奶屋企都有一部⋯⋯」 唔少做生意,又熱衷投資嘅巴打,依然經常黐住部計數機,覺得計數機都係「lucky嘢」,例如某部機幫過佢賺過幾次大錢,做過幾單肥到豬頭嘅大job,就認定部機「腳頭好」,用咗十幾廿年,跌過落地,個殼有少少爆裂都黐番佢照用,甚至稱呼部機做「戰鬥機」,話陪過佢喺股海樓巿出生入死,死過又翻生喎(吖!呢個老闆幾有人情味,對部機仲好過對啲伙記)。 | |
實際啲講,計數機真係有分好撳同唔好撳,極可能係目前最多人用嘅日本CASIO,2015年發表咗佢哋有史以來最貴嘅卓上型計數機S100,有幾貴?29,800日圓(折合約港幣2000元),MenClub讀者「法國賭神皮亞.卡箱」早前PM我哋,話佢搵代購網喺日本買咗一部番嚟(連代購費,埋單約$2400),佢問MenClub有冇興趣拎去試玩。嘩!賭神呀賭神,你對我哋真係好,我哋梗係唔客氣。 包裝相當簡約,白雪雪 賣咁貴,有乜咁巴閉? 原來S100喺日本製造,真正Made in Japan,S100喺日本本州西部嘅山形(Yamagata)廠房製造,山形廠房擁有Casio最先進嘅生產設備,一直係Casio高價系列產品嘅大本營,亦都係Casio全球各地生產線嘅中樞,喺呢度出產,QC自然更加嚴謹。 | |
S100屬12位數設計,顯示屏採用雙面反光塗層(Double-sided Anti-Reflective Coating)設計,坐喺公司,一大排光管或射燈照落部機,字體仍然好清晰。 決定一部計數機好唔好撳,好睇按鍵嘅設計,S100採用咗V形鍵托同薄身懸浮結構,前者能夠更集中按鍵時嘅向下行程壓力,唔會好似啲幾廿蚊貨仔,篤落去嗰吓,硬係好似「jit」來「jit」去;後者嘅懸浮結構,令手指頭同按鍵嘅觸感更直接,令用家有「打得好應」嘅感受。 | |
抗反光表現極佳,坐喺窗口位加有一排光管射住都睇得好清晰, 啱晒放喺老世房或拎入conference room鋤人交數 | |
一部高質素嘅日製計數機,閒閒哋用十年廿年冇問題,Casio為咗令按鍵更襟用,放棄咗喺按鍵上印字嘅方法,改為將字體顏色嘅塑料同按鍵所屬嘅塑料,直接壓製成形一體,咁即係話,呢世都唔會變色,話之你手汗有幾勁,亦唔怕你鍾意用金屬筆頭「篤機」。 | |
講你,你可以唔信,但Made in Japan嘅Casio計數機真係好襟,仲記唔記得那些年嘅fx-3800p? | |
要好撳,梗係要喺人體工學做多啲工夫,例如最底一行嘅按鍵,就係採用拱形設計,其餘則採用U形佈置,好處係:當手指喺鍵盤中央區域按鍵時,用力更集中,減低走位,撳錯隔嚟掣嘅情況,而最低一行嘅拱形鍵,就令用家「離手」時更順暢,更覺更爽。 S100嘅面板以鋁金屬整塊砌割及開孔而成,機身及外框以鑽石切割法加工,所以,不論放喺柔和同銳光,反光位都好立體,連四捨五入選擇鍵都以鋁金屬切割而成,金屬感強烈。 | |
拎上手,S100成部機好平衡,而底部嘅軟膠,除咗有效卸減「快打」時嘅震盪力,亦令機身穩固貼喺枱面,好正。 | |