新嘅Spectre號稱係全球最薄，一體成形鋁質機殼，令黑金色機身又輕又薄，令Spectre只係得10.1mm，重1.11kg。13.3" IPS屏幕用咗Gorilla第四代強化玻璃，機身底部更用埋耐花碳纖製造，而金色隱藏式骹位更有一對B&O喇叭，絕對係HP史上最有品味嘅laptop。

至於規格方面Spectre一樣出色，唔用市面薄身機常用嘅Core M，反而精心設計機內空間，令Spectre可以偷位用到i5同i7處理器，而且仲用埋對流式雙散熱風扇。雖然唔及得冇風扇嘅Core M咁靜，但Spectre風扇都係好細聲，唔會因為兩把風扇就特別嘈。

除此之外，Spectre有8GB RAM兼最高支援512GB SSD。超薄機身仲保留到有3個USB 3.1 Type C位，而當中兩個仲兼容Thunderbolt添，續航力方面就有差唔多9個半鐘。Spectre售價1250美元，大約1萬港元，4月25日開始接受預購。