無錢買金唔緊要，買有「黃金酒液」之稱嘅威士忌，一樣咁賞心悅目。講起金，以前美國California就發生過一陣淘金熱潮，幾十萬淘金者穿洲過省嚟到加州尋夢，今次呢枝Gold Bar威士忌就係講緊百幾年前，一班Fortune Seekers 嘅歷史。

金光閃閃嘅包裝，刻意造成金條形狀，標誌住呢枝作品有個Gold Finish，即係釀製嘅最後階段，啲酒會經過一個24K金Filter。呢個Gold Filter有咩特別作用，相信大家都係憶測之中，但噱頭嘅嘢，聽完飲落又好似特別過癮。

不過可以話俾大家知，除咗個Filter，枝酒無一樣嘢係金造，包括樽身正面個「Lady of Fortune」硬幣。個硬幣原版真係用金架，仲要係美國傳奇藝術家 Steven Noble 手製，不過包裝盒上面嘅硬幣只係銅質複製品。

穀物混釀，88% Corn、9% Rye、2% Barley，40% ABV (80 Proof)，蜂蜜般嘅黃金酒色，酒香泛溢出草本、香料、丁香同荳蔻，少少甜美係由雲尼拿、蜂蜜、蘋果風味組成。入口首先感受到香料香辛，仲有蘋果、柑橘、蜂蜜等甜味，酒體輕盈而柔和，收結非常順滑。

Source : http://goldbarwhiskey.com/