如果錶迷年頭嗰陣無機會去SIHH或者BASEL錶展，咁大家更唔可以錯過9月10號，香港鐘錶展嘅公眾開放日。除咗本地、強國錶商之後，會展Hall 3E會有一個World Brand Piazza國際名表薈萃，雲集Bovet、Breguet、積家、GO、Piaget等13個國際頂級品牌嘅最新腕錶。而Bovet今年嗰隻Récital 18 Shooting Star就係全場焦點之一。

非常複雜嘅盤面展現出超卓嘅製錶工藝，世界時間、月相，同樣運用立體半圓球方式顯示，極為精巧創新。首先從3點鐘位置睇，第一個半圓球體，塗上地球圖案，為世界時間顯示，其上方有兩個同心滾輪，內、外輪合共24個城市，用家能夠以之選擇相應時區，球上嘅白色指針配合外環小時刻度，即可閱讀所選地區嘅時間。

左邊9點鐘位置，另一個半圓球體為月相顯示，球體上面以「NORD」、「SUD」兩個圓框表示北、南半球，用家可以喺框內觀察月相變化。正上方12點鐘，細針為5日嘅動力儲存，而大針以扇形展開，為60分鐘逆跳顯示，而小時則使用跳字設計，大方地置於錶盤之正中央，即動力儲存指針嘅正下方。最後6點鐘位，當然係精巧無比嘅陀飛輪框架同板橋。

以上嘅高超工藝，穩妥地佈置於46mm嘅圓形18k白金、紅金錶殼之中，錶面與錶底均採用藍寶石水晶玻璃嘅透視設計，腕錶運作一覽無遺。17DM01-HU手動上鏈機芯，提供到120小時動力儲存，配備特別恆定動力調校系統，以確保腕錶多項複雜功能嘅正常運作。全球限量50隻，價錢HK$2,655,000！