喺高速公路揸車，經常見到唔少快線L、重Brake L、斜跑內閃L、騎兩線L，總之各式各類型騎呢粉人三山五嶽都有，如果你EQ低少少，諗住想用自己血肉之驅同你部愛車懲罰對方，喪cut番對方或爬頭插番對方轉頭，分分鐘玩出火自己瀨嘢撞車，又或者被其他人部車cam影到你，影唔到對方時，你啲反擊低能嘢被全記錄兼上晒facebook，大大鑊。

其實，公路你爭我爭，總有呢啲鬥氣位，忍一忍，色即是空，空即是色，唔好喺公路即場分高低累街坊。望清楚車牌，記得車型，君子報仇，十年未晚，用你自己嘅方法去解決，有可能超越法律以外容許嘅嘢不在此多談。

近日有段來自南非城巿德班（Durban）嘅公路炒車片段，短短十多日嘅點擊率已超過100萬次。有部寶馬X5估計與福士Polo喺公路「互片」，估計呢兩部車喺進入片段之前，已經喺公路短兵相接，當進入車cam鏡頭拍攝範圍之後，X5同Polo分別喺快線及第三線並排，X5先後數次輕微扭動軚盤，似乎係等待機會，伺機向Polo突襲。X5車主突然向左扭，估計想以假動作嚇Polo司機急扭軚，但X5車身高，一急扭軚，車身急速擺動向前猛伏，Polo即扭到第二線急避，X5因扭軚過急，車尾出現橫擺，X5司機想回軚修正方向，但幅度太大太急，剷咗落來回兩線之間嘅草坑，即場「收皮」全卷完。

謝謝欣賞