我深信搭地鐵返工嘅咁多位一定有幻想過以下情況：

你帶住一股口氣，兩堆眼屎走上地鐵，打緊呵欠嘅同時，目光偶然地穿個重重人馬，與車廂另一端的那個她對上了眼。就憑呢一眼，你已經看到與她相遇、相愛、雙宿雙棲的種種畫面。你知道，呢一段會係一段美好姻緣；你知道，只要你兩個向對方踏前一步，兩手觸碰，就會爆出一股萬丈金光，響起祥和音樂；地鐵會有廣播恭喜你呢段良緣，作為賀禮你可以一生使用兩蚊轉乘優惠……係咪好美滿呢

可惜，你淆底。你唔知點先識到呢個女仔。你唔敢行埋去，淨係夠膽望。一路望咗8個站，人哋終於喺中環落車，只留下一陣香水味，和一個「恨鐵不成鋼」嘅眼神……

所謂「做人做狗自己決定」，要識女仔，緊係要諗啲計。就好似呢位自稱15年來在紐約地鐵結識了500名女士的Brian Robinson咁，只要略施小計就可以打開話題。

他指在紐約，有97%的女士都是來自其他地方，所以他會以問路作借口，聽聽對方的口音，然後再打蛇隨棍上問人家鄉下喺邊。無論人哋答咩地方，佢跟住就會話自己其實想去嗰到旅行好耐，不如留個E-mail日後聯絡？

佢更加教咗幾個小Tips。第一，就是避開繁忙時間，著西裝拿公事包增加安全感、如果女的回答她家鄉就是紐約，你就話「我以為你係法國人添！」、同埋為咗吊癮，在話題去到中途的時候以自己要落車為理由離開，逼佢比聯絡方法你，另外就算拎到聯絡方法，都要等超過60小時先再聯絡。