「懶人多屎尿」，唔知點解我哋總覺得去廁所係一件好浪費時間嘅事，所以最好就去得越少次越好，慳返啲時間做啲有用嘅嘢好過。咁如果我依家同你講，喺外國有個真正嘅「黃金」機會，只係要求你屙足一年屎，就可以賺年薪十萬，你又點睇？

OpenBiome係一家專門收集人類糞便以用作醫療研究用途的非牟利機構。主要研究透過「移植糞便(Faeal Microbiota Transplant, FMT)」治療「偽膜性結腸炎(Clostridium difficile Infection, CDI)」。好深？先講下咩係「偽膜性結腸炎」。

「CDI」是指因為病人服食抗生素，殺滅了腸道中的一些細菌(不論好壞)，以致多了空間讓另一種細菌滋生，其中又以梭狀芽孢桿菌(Clostridium difficile)最為明顯，令到腸臟受感染，繼而有腹瀉、腹痛、發燒，嚴重者甚至有致命危險。

而近年有眾多研究發現，人類腸臟內的細菌除咗幫助消化，更會影響整體身體健康質素。例如英國就有研究顯示腸細菌的生態與癡肥有關，醫學家相信透過移植「健康糞便」(無錯，「移植」，而且唔係開刀，而係由「上」或者由「下」進入你嘅腸臟，係咪聽到都興奮呢？)到患者體內，就可以改變患者的腸細菌生態，從而治療各種疾病。

明咗咩係CDI，又了解咗咩係FMT，咁你就會諗到「呀！咁研究法咪要好多屎？」冇錯！所以OpenBiome依家就面臨「唔夠(健康嘅)屎用」嘅情況，所以要廣招賢士，為其提供穩定供應。

於是OpenBiome就用「每次40美元」嘅價格收買糞便，而如果你每個星期捐足5日，仲有多50美元獎賞。計返就一個星期250美元，一年就有13000美元(約10.1萬港元)。屙屎都有年薪十萬，問你死未！