係男人都鍾意追求名利，問題係究竟要追求一個咩地步先算係成功？計我話條件有兩個：第一，就係啲人會將後起之秀冠以你個名，成為「新XX」、「第二YY」嘅時候；第二，就係當後起之秀被評為「青出於藍」嘅時候！好難明？其實唔難，等我用個例子話你知。

「丹爺」Dan Bilzerian大家都好熟，唔需要再有咩特別介紹。反正喺「玩Instagram嘅人」…唔…「玩Instagram嘅有錢人」…呃…應該係「比好多女圍住黎玩Instagram嘅有錢人」呢個類別之中，丹爺絕對稱得上係開山祖師。好多男人每日打開個Instagram見到丹爺又攬住新女，都會希望自己就算做唔到丹爺咁攬女，做丹爺攬緊條女都唔錯。但你需知道得個諗字係冇用嘅！「那些不會擁有這種生活的人會說這張相片是動力，但那些總有一日會擁有這種生活的人就會開始出力。」呢句咁有道理嘅說話係邊個講出黎？咪就係有「新丹爺」之稱嘅Tony Toutouni囉！

呢位Tony是何許人也？根據表面證供(即係佢個Instagram: lunatic_living)，佢係一位億萬富翁，擁有N部名車飛機、每日比N+1條有著等於冇著嘅女包圍、會贊助女人接受隆胸手術、會買一大車玩具送畀有需要嘅小朋友、而且同丹爺係好朋友，仲係丹爺就係啟發佢開返個Instagram戶口嘅人黎

而另一樣經常喺佢Instagram出現嘅嘢，就係佢隻中指。Tony話呢隻中指已經成為佢嘅商標，仲為隻中指買咗700萬美元保險。至於點解要係咁比中指？係咪想X爆所有嘢？佢就講出一個好勵志嘅故事來。

「當時我仲係一個汽車音響銷售員，有一日我覺得自己應該做啲更有用嘅嘢，於是送咗中指比佢，頭也不回就走咗。」

「第一，我唔係針對女性，因為我對所有嘢都會舉中指；第二，係為咗證明啲相係我本人影嘅。而且無論你做咩，呢個世界都總有啲人會憎你，或者想拉倒你，等佢哋自己好過啲。呢啲人唔想努力去改善自己嘅生活，於是便貶低人家嘅生活。我隻中指就係向呢啲人表示我唔會理，我會繼續我嘅生活同X爆佢哋！」