講起大陸啲車展，大家好有可能唔記得究竟有咩車睇，但就好肯定記得有好多女睇。事實上，包括每年嘅上海車展，都會搵黎大量衣著性感、甫士誘人嘅車模助陣。若然你曾經有幸到訪，第一，你會感嘆究竟呢個展係賣車定賣女；第二，你會覺得祖國嘅道德觀念真係好差－－唔係因為佢哋擺咁多肉色部份太多嘅車模出黎，亦都唔係因為佢哋會死命追住人哋個裙底黎影相，係因為佢哋唔排隊！咁我點影啫頂！

你睇呢班車模特登化到自己塊面污糟邋遢，但又露出一對對修長美腿配高跟鞋嘅「掃把頭觀音腳」扮相，都知佢哋唔會真係乞緊米。但正如亞視唔係要清盤，你都唔會見到葉家寶喺政總外面跳舞一樣，走得出黎做馬騮戲，相信佢哋嘅生計真係受到影響嘅！

咁你可能又會擔心「以後啲車展咪冇嘢睇？」咁你又可以放心，因為當局只係禁止「車模」出 現，唔係禁靚女出現，所以現場你仍然係會見到唔少美女，只係佢哋嘅銜頭就改咗做「銷售代表」、「導購員」、「禮儀小姐」甚至「清潔大姐」咁解。咁你又會 問，點解班「車模」唔轉行做「清潔大姐」？唔好玩啦，清潔係專業技能黎架嘛，咁深嘅嘢佢哋鬼識咩！