咸爺發火：「我點湊女關你咩事？」

文：MenClub 魏文青　　
POSTED ON 11 Aug 2015

講真，睇咗咸爺踢波咁多年，印象中都未見過佢發嬲(你話98世界杯報復施蒙尼嗰腳？明明就係施蒙尼衰！哼！)，但近日呢個集靚仔、有型、有錢、好波、大隻、顧家於一身嘅絕種好男人，竟然因為個女而開火？

話說早排又有記者影到咸爺同個女Harper出街街，除咗一如以往見到Harper著得靚靚之外，仲見到今年已經四歲、識行識走仲跑贏大哥Brooklyn嘅Harper咬住個奶咀。Dailymail馬上就出咗一篇名為「點解四歲嘅Harper仲咬奶咀？專家警告碧咸夫婦繼續下去可能會令女兒出現說話和牙齒問題。」嘅文。

入面洋洋灑灑成千字，全部都係Dailymail引用各方兒童專家、湊仔權威嘅意見，指奶咀只係適合一歲以下小朋友使用，而4歲嘅小朋友正值牙齒生長期以及牙牙學語嘅時候，仲含住個幼咀好明顯就會影響有關發展。仲話作為有影響力嘅名人，咸爺父婦咁樣做會令其他父母以為一個小童含奶咀含到四歲係正常嘅事。一句講哂，就係「乜得你咁湊女架？」

結果咸爺睇到篇報導，就罕有地Post咗一大段嘢上Instagram，反撃指旁人喺未知清現實嘅情況下根本就冇資格插咀，教人點樣教個小朋友。「每個有小朋友的人都知道，當小朋友不舒服或者發燒時，你會想盡辦法安撫他，而很多時候一個奶咀就有這個功效。所以那些批評人家怎樣教小朋友的人應該要三思一下，因為你根本沒有資格批評我怎樣去做一個父親…」

簡單啲黎講，咸爺成篇嘢嘅重點就係「我點湊女關你蕉事咩！」咁其實佢又啱喎，個女係佢嘅，你又唔知頭唔知路，做咩要去話人哋做壞榜樣，仲「恐嚇」人哋個女啲牙呢？

但公平啲咁講，Dailymail篇報導雖然花咗好多篇幅去話咁大個小朋友仲食奶咀有咩唔好，但去到最後幾行都有引用專家所指，話作為名人之後、經常處於公眾目光之下嘅Harper可能需要一個奶咀令佢感到安全。而小童究竟幾時要「戒奶咀」，就完全係人家嘅個人決定，最重要係小朋友感到安全、被愛而又能與世界有接觸就OK啦！
其實Harper都有好多時候冇含奶咀嘅
講真，戒唔戒奶咀呢家嘢好小事啫，做咩要搞到人家虐兒咁款呢？好多Gents幾廿歲人，咪又係晚晚要飲奶先瞓得著！你話你冇呢個習慣？咁你晚晚上MenClub做咩呀？