近日Juno嘅《耿耿於懷》、《念念不忘》、《羅生門》呢套愛情3部曲咁Hit，搞到夜闌人靜嘅晚上，都特別容易胡思亂想。諗返起昔日的愛侶，無論你係「其實你是一幅畫 狠狠往這舊人心上掛」嗰個，定係「那動人時光　不用常回看」嗰個，都好難完全忘記舊愛。

不過，都有首歌叫《分手要狠》，決定分手，就切勿拖泥帶水，同前任糾纏不清，煩到自己又煩到人，咁又可必呢？就算你屎忽痕想搵前度傾吓偈，都千祈唔好講以下幾句，如果唔係到時有麻煩就要唱《犯賤》架喇。

如果你係飛人嗰個，就唔好同前度講以下3句說話︰

「我哋做返朋友啦」

好心你啦，你都飛咗人，就唔好期望同人做返朋友，你明知對方當唔到你係朋友，一定會將你放喺心入面一個重要地位，講真，咁樣講，都係你自己好過啫，其實對對方而言，要同你做返朋友係好痛苦嘅事，由得佢忘記你咪算囉。

「我好掛住你」

你都飛咗人，又冇諗住復合，又何必講啲畀假希望嘅說話對方聽呢？

「其實我都講唔出點解要同你分手」

你。呃。人。其實你懂的，你知自己想分手嘅原因，只係好多時自己唔想做醜人，講唔出口先扮唔知分手原因，然後將責任推落對方身上。你咁講到唔清唔楚，只會令對方一直以為自己虧欠你。

如果你係畀人飛嗰個，都唔好同前度講以下3句說話︰

「冇咗你我過得更好」

講呢句說話並唔會真係令自己更好，既然你同前度講得出呢句，只會畀對方睇穿你對佢仲好耿耿於懷，放唔低佢，仲活喺佢陰影下。真正過得好的話，你冇需要刻意同前度交代。

「我嘅新情人比你更好」

呢句說話都係同一道理，如果你真係搵到一個更好嘅對象，其實你已經贏咗，冇必要再喺前度面前爭返啖彩。

「你嘅xxx真係好唔得」

無論前度有咩缺點，分咗手就唔好再拎嚟同佢講，咁做只會令佢更睇唔起你，而你亦顯得好唔大方，對畀人飛好唔忿氣。如果佢真係咁差，你應該慶幸自己已經同佢分咗手。