男人唔得就可以食偉哥，女人唔得又點算好呢？好多男人可能睇得AV多，成日誤以為女人面對啪啪啪這回事時好易有Feel，事實上，唔少女人對性都有冷感問題，聽到另一半想做愛，就諗盡辦法左閃右避，更甚的是，因為長期冇和諧的性生活，搞到二人關係破裂，真係陰公豬。

不過而家唔需要再擔心女伴冇Feel冇得啪，因為美國食品及藥物管理局（FDA）終於批准第一款女性偉哥上市！

呢款女性偉哥叫Addyi，由美國萌芽製藥（Sprout Pharmaceutical）研發，專門治療患上性慾障礙（Hypoactive sexual desire disorder）嘅女性。

不同於男性偉哥靠增加血液流動令陰莖勃起，女性偉哥係透過原為抗抑鬱藥嘅氟班色林（Flibanserin），改善腦內「快樂物質」多巴胺及血清素嘅平衡，從而刺激女性性慾。同部分抗抑鬱藥類似，女性偉哥需要長時間服用先有效。

2,400名平均36歲嘅性慾障礙患者參與臨床實驗，維期24星期，每日服用100mg Addyi，結果佢哋喺服藥期間，每月平均增加咗0.5至1次滿足嘅性經驗，同時提升性慾，減少咗性焦慮。

不過實驗中，測試者普遍都出現血壓低、噁心、疲倦、暈眩等副作用，而且混合酒精服用嘅話，副作用會更嚴重，同時Addyi都唔合肝功能受損嘅人使用。所以FDA規定Addyi包裝盒上，須加入警告字句，提醒醫生及病人用藥嘅風險。