成日聽人話「人帥真好」，靚仔唔出聲就係cool，肥毒柒唔出聲就係玩自閉，就同世人優待靚女一樣，靚仔同醜男之間就係存在住不平等條約，難怪唔少男士都好似豬扒望女神一樣，望住男神不禁湧現羨慕妒忌恨嘅心情。

不過凡事都係你睇我好我睇你好，女神畀人當花樽畀人杯唔通又話你知咩？靚仔一樣都有難言之隱，雖然講出嚟大家都覺得︰「妖！曬命啦你！」但事實上，你未做過靚仔又點知靚仔嘅苦況先？網上就有唔少自認靚仔嘅巴打大吐苦水，自問顏值有返咁上下嘅巴打，又覺得中唔中你心聲先？

成日畀人標籤靚仔=花心
Come on James！！！其實真正花心嘅更多時候係口花花懶幽默嘅凡人囉！

有咩事分手實係靚仔嘅錯，唔理真相，講講都會幫女方講說話
靚仔某程度而言都是原罪

個個都覺得︰你咁靚仔，實好易有女朋友
實情係，多女黐埋身，但個個都貪圖靚仔嘅色相，唔係真正了解靚仔嘅內心；而真正嘅有心人，往往會覺得靚仔多女圍而卻步

認真搵女朋友會比普通男仔更易被拒絕
好多女仔都會覺得靚仔冇安全感，而且對自己實係玩玩下，於是唔敢搏，忍痛拒絕對方，但其實生得靚仔唔係錯……

即使靚仔，但生得矮或家境清貧只會更被人嫌棄
靚女高，可以做model；靚女矮，夠晒小鳥依人，但靚仔一旦矮，只會畀人嫌浪費咗個靚樣，如果加埋窮，仲會畀人有種錯覺︰得個樣，其他什麼都不是。

同女仔傾偈=媾女
妖！正常社交咋嘛！你唔同異性講嘢嘅？？

畀人一種疏離感
好多人覺得靚仔靚女都係高不可攀，甚少有勇氣埋身，就算單純想同靚仔識個朋友，都怕其他人覺得自己動機不良而打退堂鼓。

成日畀人懷疑一早唔係處
靚仔一定媾死女，細細個已經係百人斬，但事實上，都有好多靚仔20歲仔先搣甩青頭仔嘅朵