《復仇者聯盟3》上映，全球轟動，身邊不少兄弟都忍唔住呻，條女都響戲院出晒醜，仲核突過首映叫袁偉豪扮晒嘢大明星果位行內人……

譬如話有朋友條女響套戲開場幾分鐘就問，咦超人唔係同佢地Friend返啦咩？點解仲未出現既……又有朋友條女睇到最後問，點解佢地唔叫神奇女俠嚟幫佢地？蝙蝠俠呢？蝙蝠俠去咗邊？點解成集都唔出？點解蜘蛛俠咁後生既？前幾年唔係有套《蜘蛛俠》架咩？咁《復仇者3》即係前傳呀？係發生響前幾年果套《蜘蛛俠》之前既事嚟架？

網上有所謂Marvel迷的理想女友，分三個等級。最低等是不會陪你看，覺得這些超級英雄片好悶好無聊唔知做咩打打打，仲唔畀你搵人睇，因為覺得你一沉迷就會冷落佢；第二級也是最普遍等級，就是不管陪你一齊睇咗幾多集，仍然分唔到邊個打邊個，一邊睇一邊問你各種黑人問號鳩問題，令你啼笑皆非，佢唔知道《美國隊長》果個bucky就係後嚟既Winter Soldier，記得唔知邊集有個壞人好勁最後又變返好人，話好鍾意《銀河守衛隊》但睇完都唔知道《復仇者3》佢地有出過場，又或者將黑寡婦同神奇女俠撈亂咗……

最理想的女友，是全程陪你一齊睇，知道發生緊咩事，睇完仲會同你一齊搵原著漫畫對比，同你一齊搵彩蛋，甚至離開戲院就去玩具店搵figure搵玩具……之但係就算畀你遇著呢啲可遇不可求，真正不能錯過的女友，男人原來都好愁……

最近身邊某兄弟就係咁。條女睇《復3》對啲彩蛋同細位呼應仲熟過佢，男人以為執到寶，後尾先知原來條女前男友係超級Marvel迷，個身形仲同雷神差唔多……男人知道咗，唔單止個人灰晒，仲對Marvel啲戲蒙上陰影，開始連睇都唔想睇……

唔怪之得以前啲前輩成日話，如果你識到條女佢完全知道咩係越位，皇馬同曼聯有咩人，千祈唔好開心住，因為佢已經畀人調教過晒，帶佢進入呢個國度既，唔係你，而係前面果位師兄……

諗到呢度，原來自己條女唔識邊個打邊個，都唔係一件壞事。

作者簡介: 香港新生代作家、作詞人及主持人