悲報! 麻倉憂引退!

文：MenClub 魏文青　　
POSTED ON 25 Aug 2016

請留意，我唔係寫「麻倉憂引退？」冇問號，係指當中冇任何懸念。呢位經歷大量發片、引退、下馬、復出、再引退，伴隨我哋接近7年嘅女優，確認再一次離開AV界。又一個，唉。

根據劍大「一劍浣春秋」今日下午嘅報導，麻倉憂嘅事務所「Sunpro」明確指出麻倉憂BB已經正式引退。其實有留意開麻倉憂BB就知道，佢喺幾個月前就已經冇新片發出，而且Blog無更新、Twitter冇玩，亦冇舉行過任何見面會，所以只要一唔拍新作，麻倉憂BB幾乎係無影無蹤。六月尾嘅時候劍大仲曾經聯絡過「Sunpro」，當時對方畀嘅答案係「人還在，但在休息」。估唔到兩個月唔夠就已經確定引退。

其實，唔好講我哋，連「Sunpro」同麻倉憂BB嘅片商「WANZ Factory」可能都冇估到麻倉憂會引退。因為麻倉憂BB與事務所嘅聯絡一向都非常疏落，每個月事務所只係用電話或者Email通知佢拍攝時間、地點同大致內容，連佢到時係咪真係會到都唔肯定。結果因為唔知咩原因，佢就先同事務所講想休息，最後正式唔玩。中間連拍一部所謂「引退作」嘅時間都冇。

麻倉憂由09年出道，一開始係以素人嘅身份拍片，當年只係得20歲嘅佢憑住非常出眾嘅外表，立刻就成為AV界嘅新星，後來就進入老牌片商K.M.P成為專屬女優，2011年仲拎埋「成人廣播獎」嘅女優賞，當年乃係AV界首席美少女，相信亦係唔少香港男仔嘅夢中情人。不過去到2013年3月佢就突然宣佈引退，當時好多男士(包括我)都非常震驚。

更加震驚嘅係同年暑假佢就突然下馬，拍咗好幾套無碼片，一個美少女AV女優連格仔都冇埋，裏裏外外比你睇哂，當然又引起一股熱潮。唔知係咪發覺自己仲有市場，於是麻倉憂引退大半年之後，同年11月又再復出。2014年頭於K.M.P卒業，同年6月加盟「WANZ Factory」成為專屬，一直發片至今。

復出之後，麻倉憂嘅身形有少少走樣，作品風格亦有些微改變。最明顯嘅係幾乎每一部作品都係「中出」收場，對比起之前以清純美少女為賣點嘅作品可謂一大突破。但唔知係我心理作用定咩，感覺上麻倉憂復出後嘅演出亦冇咗之前嘅熱情，有時真係會令人無法代入其中。或者當時嘅佢已經將AV當成係兼職，純粹搵錢至上。

至於麻倉憂有冇機會復出？劍大話事務所方面冇講到一定唔會，但再復出對麻倉憂，甚至對影迷黎講又算唔算係好事呢？我都唔知，唯有寄望不論佢復出與否，最緊要都係過得開開心心。