放完復活節長假期，風流過後又要從宇宙旅程返回地球，部份巴打更可能要回到地獄，重投經常肚餓口渴加「雙急」一齊嚟嘅日子。去廁所梗係要靠你自己啦，食呢方面，Mean娜都可以盡少少綿力嘅。

人類喺上世紀有多項偉大發明，當中一定要數即食麵同杯麵。

放工後鬼死咁攰，仲要係長假後第一個黃昏，我頂！邊有心情煮飯仔，是但煮個麵都唔係好想！That's why Menclub早前就教大家「即食麵昇華大法」（參閱︰http://www.menclub.hk/gourmet/2615），等你食麵都有番啲「過癮位」。食完湯麵，不如今期試吓食撈麵。

我梗係知即食麵杯麵食得多無益，日本夠有幅射啦，你咪又隔月去一次。

成日話market大嘅產品先有進步空間，喺印尼呢個2.4億人口嘅國家，佢哋嘅「國麵」－營多麵（Indomie），唔單止有大把國民撐，連星馬泰澳紐港台日韓都鬼死咁多fans。佢哋嘅杯麵更於2013年美國網站The Ramen Rater的「全球好食杯麵排行榜」中，獲得即食麵達人Hans Lienesch滿分評價。Hans Lienesch話自己十幾年前已喜歡食營多杯麵，覺得麵條質感好，甜甜辣辣的味道令佢上癮咁話喎。

營多杯麵Mean娜好少食，所以不便評價。今次想講嘅係，喺香港食民圈子中快速上位嘅營多撈麵！

營多撈麵係一種印尼式撈麵，冇湯底，附有兩包調味料，一包有甜豉油、辣椒醬及調味油3種醬料；另一包有乾調味粉及乾洋蔥碎。

營多撈麵價錢平（「力場」開心價$12.5五大包），所以特別受學生歡迎。Mean娜讀大學時聽聞，唔少住Hall嘅同學，房裡面點都有幾包丁麵、福麵同營多撈麵。

營多撈麵大熱，曾經喺高登引起話題。話說高登討論區經常有人討論營多撈麵，於2009年8月，有高登巴打出Po話，可能營多撈麵調味粉嘅關係，幾乎食到上癮，旋即獲得大量網民回應。由2009年8月21日起，部分高登會員忽然發出大量與「營多撈麵」有關嘅Post，至翌日達到頂點，引發「營多822事件」，一度成為網絡熱話。

不少網民紛紛探討，營多撈麵點食先正，Menclub就集高登各食神秘技之大成，同你回顧各門各派嘅Indomie炮製攻略，跟手教埋你撈麵新食法，等你今晚撈撈佢。

標準營多撈麵煮食方法︰

1. 將麵放入400毫升滾水裡煮3分鐘
2. 將調味包、油包、豉油、辣椒醬（可隨個人口味）攪拌均勻備用
3. 麵煮好後撈起瀝乾
4. 將麵條放入已拌好的調味料中攪拌
5. 添上煎蔥

另外包裝袋上，建議加入煎蛋、蝦仁及青豆等配料，喂！你估呢度係《都巿閒情》咩！

蜜糖篇

如常整好一個營多撈麵，然後加入大約3分2茶匙蜜糖。由於營多撈麵的辣椒醬帶有甜味，所以撈麵味道咸中帶甜。加入蜜糖可以突出甜味，令整體味道更為濃厚。

芝士篇

芝士撈麵一向都好Match，除了可用芝士粉，亦可用芝士條或整片芝士。

白醋篇

唔好以為白醋只可以用嚟醃菜，加少少落撈麵，一樣可以發揮吊味功效，酸酸甜甜仲好醒胃！

蠔油篇

蠔油同樣偏甜，加入營多撈麵更能帶出又咸又甜的味道。米話唔提醒你，蠔油都係李錦記舊裝最好

材料︰
1. 營多撈麵 一個 
2. 熱狗包 一個 
3. 沙律醬 適量 
4. 即食紫菜 一包 

做法︰
1. 按正常步驟煮好營多撈麵
2. 熱狗包中間切開
3. 將麵放入熱狗包中間
4. 將紫菜插入包裡面
5. 最後加入沙律醬