【傳奇球員】平凡中的不平凡 - 高路斯

文：MenClub Mr.波特　　圖：互聯網
POSTED ON 01 Jun 2017


如果你唔太熟悉世界盃嘅話，你可能會以為世界盃歷史上入球最多嘅球員會係好似朗拿度、比利、馬勒當拿等呢啲世界知名前鋒，但係事實上喺世界盃歷史入球最多嘅球員卻係黎自德國嘅前鋒高路斯(Miroslav Klose)。

現年38歲嘅高路斯，喺2016年11月宣佈自己掛靴嘅消息，其後轉為協助德國國家隊，成為當中教練嘅一份子，繼績自己嘅足球生涯。

高路斯唔似C朗拿度、美斯同朗拿度呢啲世界最具天賦嘅球星，首先佢無好快嘅速度，身型又唔係好似C朗咁特別勁爆，1.84m嘅高度高又唔係話好高，但係佢就係擁有異於常人嘅入球嗅覺以及頂上功夫，當然再加埋佢後天嘅努力，先可以造到就如今難以被打破嘅紀錄。

高路斯9歲就開始進行青訓，但係由於佢並無咩特別出色嘅能力，所以一直都只係喺低組別嘅球隊接受訓練，到20歲嘅時候佢都仲係踢緊預備組，相信個陣時真係無人會諗到呢位球員會係德國史上最偉大嘅前鋒。

黎到21歲，高路斯終於有大球會賞識，德甲球隊凱沙羅頓成功將呢位前鋒收歸旗下，但係加入初期佢都仲係首先被安排先踢預備組。直到2000-01球季，高路斯才真正成為一隊成員，但佢嘅表現並無好似預期咁非常驚豔。不過相隔一季，高路斯終於展現出佢射手嘅本能，佢喺德甲上陣31場成功轟入16球，距離神射手第一位都只係差2球而已，可見佢絕對係一名出色嘅前鋒。

2001年1月，高路斯亦首次入選德國國家隊，好快佢就喺同年3月嘅世界盃外圍賽取得國家隊生涯嘅首個入球。之後佢又喺2002年代表德國同以色列及奧地利進行熱身賽，而高路斯就喺呢2場比賽分別上演帽子戲法，因此佢亦好順利成章咁入選2002年世界盃德國隊大軍嘅一份子。

2002年世界盃係24歲嘅高路斯首次參加嘅國際性大舞台，而當時嘅佢亦算係國家隊新人，但係佢嘅表現卻非常驚豔，佢喺第一戰面對沙特阿拉伯時已經上演帽子戲法，之後面對愛爾蘭同喀麥隆佢又各入多一球，最後德國隊雖然喺決賽飲恨，但係高路斯首次參加世界盃已經攻入5球，喺當季僅次於攻入8球嘅朗拿度，成為賽事嘅銀靴得主。值得一提嘅係，呢屆賽事高路斯5個入球全部黎自頭搥，因此令佢慢慢多左空中霸王呢個稱號。

喺02世界盃之後，高路斯開始為人所認識，不少歐洲豪門都開始計劃將佢簽下，但係只愛留喺德國嘅佢最終喺2004年選擇以500萬歐元轉會費加入德甲嘅雲達不來梅，而喺效力呢支球隊嘅期間，可以話係高路斯球會生涯最出色嘅時候。2005-06球季，高路斯喺德甲上陣26場攻入25球，首次成為聯賽神射手，並且成為了當屆德甲嘅最佳球員。

而喺2006年世界盃，高路斯已經喺德國隊嘅首席射手，而佢亦無令球隊失望，佢個人再次喺賽事中攻入5球，成為了賽事嘅金靴得主，但好可惜德國喺4強不敵意大利出局，而季軍戰佢地就以3：1擊敗葡萄牙，取得賽事季軍。

由於喺世界盃出色嘅表現，高路斯引來歐洲所有頂級豪門嘅爭奪，但係最終佢都係只想留番喺德國，所以決定加盟班霸拜仁慕尼黑，加盟拜仁頭兩季，高路斯成功交出好表現，兩季分別交出21及20個入球，成功為球隊帶黎德甲冠軍以及德國盃冠軍，但後來31歲嘅佢開始出現傷患，效率及入球能力都下跌得好快，最終失去正選位置。雖然狀態明顯下滑，但高路斯喺2010年嘅南非世界盃依然喺德國隊嘅主力前鋒，而今屆高路斯就交出4個入球，德國隊就再次成為賽事季軍。

由於喺拜仁已經無法再以正選上陣，因此高路斯去意已決，最終佢喺2011年夏天首次離開德甲，轉投意甲球隊拉素。雖然年紀漸大，但高路斯喺拉素卻交出不下於喺拜仁時期嘅表現，最終佢為拉素效力左5季，一共上陣左170場攻入63個入球，期間為球隊帶黎1次意大利杯冠軍。


2014年巴西世界盃，高路斯以37歲之齡第4次代表德國參加世界盃，但係佢仍然喺球隊嘅正選前鋒，最終佢今屆為德國攻入2球，而德國亦終於成功奪得當屆賽事冠軍，對於高路斯黎講真係再無遺憾。另外，4屆世界盃高路斯合計攻入16個入球，成功超越朗拿度嘅15球，成為世界盃歷史上入球最多嘅球員。

高路斯球員生涯屬於低開高走，雖然無驚人嘅天賦，但係就憑佢不懈嘅努力，踢出最實而不華嘅足球，成為足球史上最出色嘅前鋒之一，佢亦都係德國史上繼「凱撒大帝」碧根鮑華後最偉大嘅足球員。