【新舊交替】巴塞隆拿的巨星更換過程

文：MenClub Mr.波特　　圖：互聯網
POSTED ON 23 Jun 2017


巴塞隆拿係歐洲足球豪門之一，而對上10年呢支西甲班霸亦踢出獨有嘅足球，繼而被世人稱之為「地上最強」，可想而知佢地究竟有幾強大。但其實早喺90年代，巴塞已經喺西甲取得驚人嘅成績，而當時每一個時期嘅巴塞都有一位巨星級人物，但係就好奇怪咁出現左一個較為特別嘅現象。

90年代初，巴西前鋒「獨狼」羅馬里奧喺1993年從PSV燕豪芬轉投加入，隨即憑住羅馬里奧個人首季喺聯賽即攻入30球下，巴塞成功奪得西甲冠軍，而羅馬里奧自己則獲得西甲神射手寶座。成功協助巴塞奪得西甲冠軍後，羅馬里奧又喺94世界盃助巴西奪得冠軍，成為人氣一時無兩嘅超級球星。

不過短短效力巴塞1個半球季後，羅馬里奧就因同球隊不和而被賣回巴西。失去羅馬利奧後，巴塞實力明顯大幅下降，但好快佢地喺1996年成功羅致「外星人」朗拿度，同年呢位超級前鋒獲得世界足球先生殊榮，並且喺西甲攻入34球，成為聯賽神射手。

同羅馬里奧一樣，雖然朗拿度表現出色，但因為同球隊鬧不和，短短效力巴塞一季就被賣走。而失去朗拿度後，巴塞好快就喺1997年搵到另一個人取代「外星人」嘅位置，佢就係同樣黎自巴西嘅「左腳王」李華度啦。李華度一加入巴塞就成功融入球隊，並帶領巴塞連續兩年奪得1997-98、98-99球季嘅西甲冠軍。同時，喺1999年李華度亦加冕成為金球獎同埋世界足球先生。

2002年夏天，李華度決定離開巴塞，並轉投AC米蘭。因為頓失支柱，巴塞2002-03球季隨即四大皆空，但呢個情況再一次好快就過去，因為佢地成功喺2003年夏天從巴黎聖日耳門帶黎「細哨」朗拿甸奴。朗拿甸奴嘅事跡應該唔使多講，佢可以話係令巴塞嘅足球進一步為人所認知，特別係佢帶比人嘅快樂足球。而「細哨」亦喺2006年為巴塞帶黎隊史第2個歐聯冠軍，亦都係當時球隊巔峰期嘅一個開始。

朗拿甸奴從2003年開始效力巴塞至2008年夏天，而今次唯一不同嘅係巴塞無再搵其他巨星番黎啦，因為佢地已經成功從青訓造了另一粒星，佢就係美斯啦。美斯2004年開始進入巴塞一隊，同「細哨」做過4年一隊嘅隊友，不過當時嘅美斯都仲係非常年輕，所以球隊核心位置仍然屬於朗拿甸奴，所以個4年入面，美斯最多就只係一季入過17球，明顯未達到巨星嘅級別。

而就喺2008年「細哨」離隊後，巴塞正式將核心位置交比美斯，而美斯亦沒有令巴塞失望，佢喺08-09球季即刻攻入左38球，並帶領巴塞成功奪得西甲、歐聯及國王盃冠軍，歷史性成為三冠王。

之後美斯就一直帶領巴塞統治球壇多年，直至近兩年皇馬重新掘起，令人開始質疑巴塞，又或者係美斯已經神奇不再。唔通巴塞又係時候將球隊巨星送走？要將美斯送走呢個決定真係無法想像，但係睇番巴塞一直以黎將巨星送走後，球隊就可以即時翻身，所以真係好難唔諗下送走美斯呢個決定。而「如果」巴塞真係送走美斯後，佢地究竟會搵黎另一位巨星，定係扶正尼馬做球隊核心呢？呢層就真係要拭目以待啦。