萬用槍 3COIL多功能掌上工具「Puna」

文：MenClub 魏文青　　
POSTED ON 01 Jan 2018

唔少男人可能都會帶把萬用刀旁身，就算霎時間開啤酒、切生果、上螺絲都有架生喺手。如果你都想要同類型嘅多功能工具，但又覺得萬用「刀」太平凡，咁你或者就會對Kickstarter集資緊嘅呢把萬用「槍」有興趣啦。

呢把Puna係由英國公司3COIL設計，表面上睇落係一個機關槍型嘅鎖匙扣，但其實內藏兩個唔同大小嘅螺絲批、一個開瓶器、同一把柳葉刀(即手術刀)——所以嚴格上都係一把萬用「刀」黎。3COIL本身出嘅係小型摺疊刀，今次就將原有嘅技術融入Puna，將刀藏於槍身，輕易推出使用。滅聲器部份其實係一個小十字批，除咗可以扭眼鏡螺絲之外，亦可以為Puna更換刀刃。而槍夾位置就係大少少嘅十字/一字批，槍托部份就係開瓶器。

PUNA目前於網上集資中，最平嘅早鳥優惠只需20USD(約156HKD)就可以買到一把，詳情可以去返Kickstarter頁面參考。最後都要提提大家眾籌有一定風險，大家衡量過先好落手呀。