【世錦賽決賽】回憶中的夢幻對決 - 威廉士 vs 希堅斯

文：MenClub 波特先生　　圖：互聯網
POSTED ON 07 May 2018

今年世錦賽當世界第一嘅沙比意外首圈出局，到後來世界第二嘅「火箭」奧蘇利雲亦喺次圈被擊落後，可能變相令大家覺得今屆賽事好似有啲失色，但最終決賽嘅戲碼卻令人熱血沸騰，因為兩位選手就係75三傑當中的兩位 - 威廉士(Mark Williams)及希堅斯(John Higgins)。

雖然75三傑當中以奧蘇利雲成(生涯33個排名賽冠軍)就最高，人氣亦都係以佢最高，但係威廉士及希堅斯亦都絕對屬於傳奇級球員，因為前者生涯奪得20個排名賽冠軍(歷史第5)，後者則更加奪得30個排名賽冠軍(歷史第3)。

要知雖然威廉士及希堅斯打左咁多世錦賽，只係試過喺1999、2000及2011年嘅賽事準決賽交手，二人從來未試過喺呢個賽事嘅決賽碰頭，所以今次嘅決賽實在有如夢幻一般嘅對決。

75三傑如今分別都42及43歲，雖然桌球要求嘅體力無其他較為激烈嘅運動咁高要求，但係身體協調性及準繩度都需要非常高嘅要求，佢地三位無論技術點樣爐火純青，總有一日身體能力都無可奈何會退化，最終需要退役。

而再睇番2016－17球季，威廉士未有奪得任何賽事嘅冠軍，而「火箭」就只係贏到一個非排名賽嘅冠軍，希堅斯亦都只係贏到兩個非排名賽冠軍，唔係話佢地無能力繼續贏到冠軍，但係點都會覺得佢地可能已經走緊下坡。但係勢估唔到相隔一季之後，「火箭」打出生涯最佳狀態，目前已經奪得5個排名賽冠軍，而威廉士及希堅斯則分別奪得兩個排名賽冠軍，如今後兩者更會師世錦賽決賽，上演夢幻對決，能夠見證呢場賽事作為桌球迷真係此生無憾啦！

值得一提嘅係，威廉士及希堅斯嘅夢幻對決雙方嘅對決已經展開，威廉士暫以10:7領先，究竟雙方會打到第幾局先分到勝負呢？不過無論邊個拎到冠軍都好，呢一個已經足以載入桌球嘅歷史名冊當中！

賽前，奧蘇利雲亦現身比賽場地接受訪問，亦即係話75三傑同時聚集喺會場，賽在係一個歷史時刻！