由法甲球隊南特以1500萬鎊轉投英超卡迪夫城嘅阿根廷射手，較早前乘坐前往卡城嘅私人飛機期間，因為飛機失聯至今仍然音訊全無，預計其生存機會非常渺茫，其家人目前想做嘅其實就只係希望可以證實其最終狀況。不過，另一邊廂由於Sala並無到達卡城向新球隊報到，因此球員轉會費一事原來仲未解決。

據最新報導指，卡迪夫城喺Sala失聯前兩天已經與南特簽下球員轉會合同，但如今前者並無照合約要求，將第一筆600萬歐元的款項過比南特。對於呢個情況，卡迪夫城方面表示可能會對南特作出提控，佢地認為係南特方面並未好好安排Sala嘅航班導致目前嘅境況。

不過，南特方面則準備向卡迪夫城作出反提控，因為佢地並無按照合約要求過數。雖然係咁，南特並無意喺現時呢個情況作出任何有關財務上嘅行動。

南特主席表示：「目前我地唔會喺呢個牽動人心嘅情況下談論金錢。而家我地唔會向對方要求任何東西，遲一點再算。」

事實上，Sala嘅轉會牽涉到第三支球隊，因為另一支法甲球隊法爾多亦仍有Sala的一半擁有權，令今次嘅Sala轉會失聯變得更加複雜。