2015年係屬於EVA嘅一年，而今日就可以話係屬於EVA嘅一日，事關動畫版第一集入面嘅第3使徒，就係今日出現。

1995年10月4日首播嘅EVA，第一集就設定喺2015年6月22日，而第3使徒出現襲擊揭開呢套神作嘅序幕。當年為男主角真嗣配音嘅聲優緒方惠美，尋日就喺佢嘅twitter講述當年今日，話「今日我喺第3新東京市，第一次遇到使徒、第一次坐上美里小姐部車、同爸爸重逢、見到成臉血嘅綾波、仲有第一次坐上EVA。」最搞笑就係連漫畫家藤島康介都留言話「我哋呢世都唔會忘記聽日發生嘅事」。

如果大家咁啱去咗箱根旅行，記得留意下有冇紀念活動。

至於新劇場版Final就仲未知幾時會出，有傳聞話會食住2015係EVA年嘅氣勢喺年底推出，但早排話日本動漫5年內就會玩完嘅庵野秀明，曾經暗示過Final可能會同上集隔4－6年先會出，即係最快都要等到2016年先有得睇。