太陽眼鏡除咗摭擋日光之外，佢嘅身份早就晉身成為日常配飾一重，即係除咗有內涵仲要有外表，即喺好似搵老婆咁，識煮餸都要有靚樣靚身形。

OK，收到，小編即時搵嚟本地眼鏡潮店，Visual Culture創辦人Pazo Ho，為大家推介2015年夏季，有邊幾個太陽眼鏡品牌最值得「巴打」留意。

Yohji Yamamoto

「已經有17、8年無推出過太陽眼鏡系列，突然間，今年品牌就決定重推一批新款式，以復古、長青、timeless設計為主，所走路線同佢嘅成衣系列設計相同，唔會特別貼近潮流，但廿年後拎出嚟都唔會out，尤其是Yohji迷肯定等到頸到長。」

Yohji事隔十幾年嘅之後再推太陽眼鏡系列，續走復古路線

多用圓框，配合品牌濃濃禪味

Oliver Goldsmith

「Oliver Goldsmith喺第一個做太陽眼鏡單品嘅品牌，所以一定要推介！在此之前嘅太陽眼鏡，都喺在傳統眼鏡框之上，再配上有色鏡片，未能夠提供完整保護作用，而Oliver Goldsmith嘅太陽眼鏡設計，無論款式及鏡框都喺為咗擋光護眼而設。品牌亦得到好多國際明星追捧，例如，Kate Moss、柯德莉夏萍、Jude Law等等數之不盡。每年都會用唔同素材及物料，復刻過去嘅眼鏡設計。」

雖然品牌都只係每年不斷將舊款復刻，但每每有驚喜

鏡框會刻上每款型號名字

Moscot

「2015年，Moscot正式踏入第一百個年頭，品牌就專程設計兩個特別款式做紀念。第一款喺摺鏡，特別之處喺柄位折疊地方用上磁石，與市面其他摺鏡設計唔同；另一款，就專程搵嚟Smart Car合作，重新將經典型號Lemtosh注入新元素，在框架中掃上橫間，用色是Moscot專屬黃色，再配製一套clip-on鏡片，一共三色，視乎太陽猛烈程度以定。」

同Smart Car聯乘，特意為不同天色出咗三款鏡片

摺鏡同鏡盒都喺為百周年紀念而推出

柄位專登有磁石設計，更加實正

Kuboraum

「以柏林為基地嘅太陽眼鏡品牌，兩位主腦本為時裝出身，設計上都專登配合佢哋嘅時裝特式，走暗黑路線，設計大膽，例如配上面紗都幾誇張，又搵嚟鑄金師傅綴金飾上鏡框，又人手燒鏡框造出唔同紋理，每副都有啲唔同，証明全人手製作。」

Kuboraum走暗黑、神神秘秘路線

綴有銀飾、金飾，好fashionable

Otto Mila

「新進品牌，目前為止只出咗兩個系列，平面鏡喺品牌signature，zero base完全無孤度，即喺話光線唔會被扭曲，唔會令用家感到唔舒服。」

Otto Mila設計走軍用式路線

零弧度設計，望真啲原來真喺好大對比

Boston Club

「日本手造眼鏡品牌，已經有30年歷史。每一個parts及造工都喺日本本地製造。」

Boston Club設計輕身，就算有clip，戴上都唔覺重

全副由日本當地製作，呢點已經夠矜貴

如何選擇太陽眼鏡須知
1.鏡框弧度要吻合面型輪廓
2.選擇框身時要比一般眼鏡大，足以摭擋光線

保護太陽眼鏡須知
尤其是揸車人士注意，避免將太陽眼鏡留在車上，因為日光照射時的高溫，或車身熄時後，車廂的高溫，足以令框身及鏡片變型，令穿者感到不適。

Visual Culture
地址︰銅鑼灣蘭芳道21號地鋪