$10000屋企撐枱腳 --試用Panasonic蒸氣磁應西施煲

文：MenClub 胡說　　圖：互聯網
POSTED ON 18 Jul 2014

同女朋友或太太想食豪少少？去五星級酒店，兩個人、五度菜，3000元左右，算唔算豪？no la！咁點先算得上「豪飯」，又唔會畀另一半咋形？可以考慮售價近萬的Panasonic蒸氣壓力式微電腦飯煲。
過去幾年，日本本土巿場都出現了一批售價介乎10萬至13萬日圓（折合約8000至10000港元）的智能電飯煲，除了樂聲（Panasonic）、三菱（Mitsubishi）、日立（Hitachi）及東芝都有推出產品，而且銷情相當不俗，這某程度上與日本人追求完美的性格有關，另一重點是：飯既然餐餐要食，點解唔整得更好味？
今次試用的Panasonic蒸氣磁應西施煲（SPX 183），主要透過四項技術，大大提升米飯香味及口感。包括「舞動沸騰」技術，令米粒在鍋內躍動翻騰，米飯均勻受熱，令飯粒更甘甜、粘糯；而煲內可以噴射達200℃高溫蒸氣，在米飯表面形成保濕層，鎖緊水份，以保護米飯的香醇度；另外，內鍋採用(黃金陶鑽鍋)「鑽石高導熱」塗層，產生大量熱對流細泡，將熱量傳給每一粒米，最後，機身設有五段H電磁加熱線圈及專利內蓋IH技術，封存大火力熱量，令白米在最理想溫度變成米飯。
話雖成萬蚊個電飯煲，但使用方法就同一般電飯煲咁簡單，而內鍋塗層亦容許用家直接作為洗米器皿，唔需要特別呵護，我哋最初以為咁貴嘅飯煲，內鍋一定有番咁上吓厚或重，原來只係比一般電飯煲內鍋重少少，望真內鍋外圍，有好多用來協助增加熱度的圓形凹點，所以，內鍋都係唔好隨便放，用完記得放番喺電飯煲內，避免刮花。至於調校米水，好easy，我哋首次使用，根據內鍋嘅刻度落水，第一次煮出嚟煲飯已好好食，米飯彈牙又靚，負責影相嘅攝影師即時嗌肚餓，叫外賣炒幾個小菜添。
話到尾，你話$10000買個電飯煲值唔值？比著係我老婆一定話：車，自己認真啲學下落幾多水都煮到喇。講就咁講，到我話要送俾佢個陣，佢咪一樣照樣煮得咁Happy，因為慳返佢唔少功夫。而且到時咁易煮，我都無乜借口話唔煮飯，計落，老婆一定讚成。