{ SKIP }
文:MenClub Frey Lai  圖:MenClub
POSTED ON 05 Jan 2017
鬥木佬迪根、殺人王保利,女人湯丸亞力士仲有火雲邪神蘇利雲,加上文遜同籮文嘅抵死旁述。冇錯!就係講緊亞視嘅經典節目《週末摔角大狂熱》。喺香港講摔角,大家可能會覺得仲離地過打馬球,不過香港就出咗兩位摔角手,上年仲勁到打入WWE比賽!今次就請嚟呢兩位猛人同大家傾下偈

Ladies and gentlemen,Please welcome Hoho Lun and~~~Jason Lee~~~~~~~~~~~~~~


香港摔角手打入殿堂賽事
其實呢個訪問我想做好耐,由上年5月開始約到9月終於做得成,但衰在自己拖稿,最後就決定用呢篇訪問作為2017年第一擊!事關1月8日喺柴灣Youth Square有場「熱血寒冬VI」摔角比賽,會有香港、泰國、日本同新加坡等地嘅職業摔角手大格鬥,聽到都覺得熱血!

講返Hoho Lun(何顥麟)同Jason Lee嘅威水史先,呢對本地摔角手上年6月就去美國參加由WWE舉辨嘅「世界輕量級經典賽」!WWE呀,對香港摔角手嚟講,就好似踢緊南華但可以打歐聯一樣咁興奮。雖然贏唔到冠軍,但就令全世界知道香港都有打出國際水平嘅職業摔角手,連最新嘅摔角遊戲《WWE 2K17》都有佢哋份!



宇宙空間代表
Hoho Lun 何顥麟 ︰「同外國摔角手打時冇被人笑之餘,原來都打得唔失禮。」

https://www.facebook.com/outerspacewrestling/

「我由2007年開始打摔角,初時只係玩玩下,後來上網搵到一班都想玩摔角嘅朋友,於是就搵個地方喺地下鋪張墊,亂打一通,當時冇人教,因為大家都只當係玩。後來覺得與其鋪墊玩,不如夾錢整個擂台啦,咁就喺沙田租咗個單位,放埋擂台就開始成日練習,當練了一段日子之後,十幾廿個摔角手就商量搞個show啦,去到2009年終於搞咗第一場摔角show。」

「當時在工廈搞完show後的一年,就想更進一步,自己去外國試試自己功夫,想知道自學的功夫有冇錯,2010年去了英國學摔角,又估唔到以前自學嘅功夫又啱,同外國摔角手打時冇被人笑之餘,原來都打得唔失禮,於是就考慮做一個全職摔角手,開始我職業摔角手生涯。」

「其實以前目標係想去日本打摔角,因為我細個時睇日本摔角比較多,但09年我就已經完成目標,後來就諗下有冇機會去美國打比賽。點知有日就收到日本朋友問有冇興趣去美國打摔國呀,我當然話有啦,於是好快就整好履歷畀佢,結果等咗3個月都冇消息,以為人哋都係講下就算,石沈大海。點知過一陣就收到WWE嘅通知,叫我過去打比賽。心諗『唔係下話,真係有架?好啦,去囉』,於我是我去咗美國比賽,仲簽埋WWE同成立自己團隊宇宙空間添。」雖然威到美國打摔角,但何顥麟話屋企人都係得個『哦』字,唔叫佢正正經經搵份工已經好感激。



港摔代表
Jason Lee︰「日本打摔角會打比較激,試過被人打到暈喺擂台。」

https://www.facebook.com/HongKongWrestling

「我叫Jason Lee,都係一個職業摔角手。我同摔角嘅邂逅都算幾奇妙,因為細個時唔知點解屋企會收到衛星電視台,而個台又睇到摔角,咁細個見到有人打得咁精彩,就自自然然鍾意咗摔角,後來喺網上見到有人召集一齊玩摔角,我覺得好難得搵到志同道合嘅人一齊玩,於是就加入佢哋嘅練習,後來更一齊成立港摔。」

見Jason大大隻,砂煲咁大個拳頭又紋晒身咁,以為佢會好狂野,點知訪問時原來比較怕醜,但換返套戰衣上到擂台影相時,啲殺氣就出返嚟。除咗李小龍戰衣之外,Jason就連絕招名都改埋做「死亡遊戲」,加上佢將中國功夫融入摔角,所以Jason喺日本摔角都有一定人氣。

「09年之後自己去咗日本打摔角,當年只係得17歲,原本只係去學3個月,但後摔角會決定畀機會我打,結果一打就4年,後來仲贏埋NWA冠軍。喺日本打摔角會打比較激,試過被人打到暈喺擂台,冇咗意識。日本摔角已經好耐歷史,觀眾已經知道係表演性質,但入場睇比賽仍然係好靜,好嚴肅。後來返香港同何顥麟一齊去美國打比賽。不過日本打完,美國又打完,但返到香港仍然係冇人識你,哈哈。」



摔角唔係渣流灘

「好多唔認識摔角嘅人都會覺得係假,等我解釋下大家就會明白。摔角其實是透過搏擊運動,利用擂台呢個地方作為平台,為觀眾提供娛樂嘅表演藝術,而我哋打嘅比賽都會表演賽。比賽入面嘅勝負唔係關鍵,而係觀眾睇睇得開心,返到屋企會回味,比較著重娛樂性。」摔角係娛樂,而比賽係表演性質,但入面用到嘅技術、體能同體能就全部都係真功夫。

「正因為係咁,所以大家都以為摔角係假,但你入場睇過就知道完全冇假,拳拳到肉,真係會成個人撻落擂台,有時會喺擂台外嘅硬地,咁點先算係假呢?假如係我打你一拳,但打唔中你又畀反應,呢啲就叫假喇。我哋每一拳每一腳都真係打中,你睇節目會到見摔角手打完都周身紅晒,我哋就好似用身體去講一個故仔畀大家聽。」何顥麟話自從佢哋去完美國後,香港都多咗人知道摔角係乜嘢一回事之後,已經冇咁多人話摔角係流灘。如果你再話假嘅,建議你唔好埋沒自己才能,上去捱一嘢先啦!現場睇你就會知道就算係假都好堅!真係拳拳到肉,我見Jason成set連續技加飛踢,真係好似打緊機咁流暢,打落嘭嘭聲。



競技摔角唔留手

摔角可以分為「競技」同「表演」性質呢兩種。大家睇美國嘅摔角可能會見到有人打打下衝上台,甚至比賽時無端端有個女仔會走入擂台錫你一啖,呢啲充滿娛樂性嘅元素喺表演賽經常生。如果喺日本打就唔同風格,因為日本摔角競技性質比較強,比賽會追求真實感,所以兩位摔角手上到擂台就算都係打表演賽,但佢哋都唔留手,打得特別激烈。

競技摔角打得更激烈,而表演摔角就娛樂性豐富,甚至有埋劇情。咁香港嘅摔角又屬於邊種呢?「由於香港一年先得幾次摔角show,所以好難有劇情,就算有劇情同人物設定,你都唔會記得。大家入場都係想睇下有咩招式,所以香港摔角風格係同日本類似,傾向競技性質。」睇摔角最開心就見到大亂鬥,由台上打到台下,有時又拎起枱枱櫈櫈互毆,香港嘅摔角一樣會有呢啲元素,氣氛都非常好。如果你都想感受下香港摔角氣候,呢個星期日,1月8日喺柴灣Youth Square就有場比賽,想買飛入場就快啲問下港摔,聽講一飛難求呀!



摔角手最緊要夠毅力

齋睇唔夠嘅,我想學摔角有咩門路先?Sorry,暫時唔會再開班。「我地暫時唔收人,因為怕人識少少扮代表,二來唔想見到人頂唔順訓練而走。因為做摔角手第一係要毅力,唔好半途而廢。大家以為摔角係興趣班,想入嚟學絕招,但其實我哋係想訓練專業摔角手,所以基本體能訓練係會好辛苦。」何顥麟同Jason亦老實講,今年佢哋都冇時間教大家,只會幫現有香港手一齊練習,希望可以令本地摔角手多啲去外國比賽,證明香港摔角手係有料到!


不論你對ViuTV持有甚麼態度,你都不能否認它近年為香港娛樂圈捧出一群至少有話題性的年輕面孔。單論《全民造星》系列就為大家「貢獻」出Mirror、Error、P1X3L、Collar四隊組合,再加MC張天賦、Mansonvibes 張進翹、A ...
people
【MenClub People】鍾意,己經夠啦 - Johnny Hui 強尼
30 Sep 2022
第一次親眼「見到」洪嘉豪,是去年年尾在Jace (陳凱詠) 的演唱會上。雖然當晚他只是作為觀眾於台下睇Show,但每到Jace準備邀請嘉賓上台時,我旁邊就會有個不知名男觀眾,不停用洪嘉豪欠他錢沒還似的語氣大叫「洪嘉豪 ...
people
【MenClub People】一步一腳印 - Kaho Hung 洪嘉豪
04 Jul 2022