首先，我要承認我係《導火新聞線》同《綠豆》嘅劇粉。鍾意《導火新聞線》嘅原因有兩個：一，方凝、輝爺、阿咩同王子4個新聞工作者都好hardcore，對自己嘅工作執著，堅持要報導真相，不畏強權，香港需要更多呢啲真香港人。二，每集劇情都好緊湊，亦都反映出社會現實，一路睇會覺得好唏噓，但同時心裡又替主角們默默加油。除咗我之外，當然仲有好多識貨之人集集追啦！《導火新聞線》劇集上年被高登網民選為年度最佳劇集，今次電影版，台前幕後原班人馬，見《導火新聞線》電影版8月4號就上映，同埋ViuTV又播緊《綠豆SP版》，就緊係要訪問吓男神王宗堯同周家怡啦！

淨係睇《導火新聞線》嘅trailer已經睇到都好緊張，一如以往有好多精彩位，感覺到電影想帶出好多message。周家怡話希望大家睇完之後會更了解記者呢個行業，呢齣戲好有香港人精神，希望大家可以睇完後有返熱血嘅感覺。男神接住講：「我幾想大家睇到有時制度會被操控，同埋愈嚟愈睇到一個世代係大家對於一啲瞬息萬變嘅認對呢，其實喺網上面，例如有好多人抱住一個『負皮』、或者指責嘅心態，但有幾多係因為網上一啲資訊而『行』出嚟？或者最近睇到會有人致敬消防員，大家對於明哥開第二間舖頭會支持，其實我覺得喺網上唔係只得鬧人及娛樂，或者無營養咁食花生，而係即使成個環境生態轉變都好，我哋希望可以喺網上講一啲認真嘅議題。」

***少量《導火新聞線》電影劇透***

電影一開始就已經好緊張，首先發生一單交通意外，同日再發生一單脅持人質案，同一日囧報有可能會摺，唔想摺，做咗代主編嘅方凝就要諗辦法搶hit rate！「我好想報導事實真相，對新聞有一個執著。但又要迎合大眾口味，搶hit rate！其實我唔想搶，但唔搶，囧報就一定會執，咁我班手足點呢？咁所以變咗果個狀態底下，方凝就好大壓力。」

有修讀過法律嘅家怡，睇得多case law，自自然然睇到好多人生百態。「香港嘅法律，suppose係好健全，但近呢幾年，身邊有啲律師朋友會講法庭內發生嘅事，例如點樣呈堂後法官唔睇，呢樣嘢令我覺得好恐怖！所以我覺得傳媒好緊要。其實所有嘢係互相牽引嘅，呢個係separation of power，傳媒好有監察能力，希望香港繼續落去都會咁。」

而睇完比記者嘅試睇版後，強烈推介比大家睇，當然難與集數多嘅劇集比較，但講緊湊度，同埋有得睇久未露面嘅吳孟達，已經值回票價。吳孟達喺電影中揸住計時炸彈：「12點前我見唔到特首，大家一鑊熟。」仲有「輝爺」王宗堯誓要揭發戲中特首嘅醜聞：「支筆喺我哋手，我哋話畀讀者聽，特首包庇高耀球。」宗堯又被兩名警察喺「暗角」合力制服。好多場面都令人睇得咬牙切齒！

《綠豆》中嘅迷思

睇返以前d電視劇，例如早排重播嘅神劇《大時代》同《誓不低頭》，都掀起追劇熱潮，韋家輝監製除咗會用對白交代之外，仲會用鏡頭、設計、角色去交代出嚟，同宜家大台果啲一式一樣......肚餓煮個麵你食嘅情節有得比較咩？所以王宗堯一向都對大台冇興趣。「冇角色、冇性格，所有職業都做埋同一樣嘢，全部shot都大頭。」

而最近嘅《綠豆》，終於燃返起我想追劇嘅心！原著南方舞廳嘅字句更係完全講中哂愛情。做咗多年大台嘅周家怡，絕對有更深體會。「《綠豆》係一個好好嘅嘗試，兩位導演同編劇都好出色。佢地好識得用鏡頭去幫啲演員，表達一個感覺出黎。正正就click中咗我地睇、電視電影都係為咗攞一個共鳴。」男神緊接住講：「佢地鏡頭除咗好藝術之外，最正係比到一個窺探嘅感覺比你，你好似偷睇緊佢哋做緊啲乜，佢會擺定定個鏡頭再轉一啲shot，你就會覺得窺探緊佢哋嘅生活，變得好現實。」身為女主角嘅瑪嘉烈，仲話拍到似導演去佢哋屋企偷拍佢哋嘅生活添。「我同大衛都覺得，我哋拍到已經唔care鏡頭喺度，個狀態唔係演戲，而真係生活緊。」《綠豆》係我入行以嚟好大impact嘅作品。」我亦覺得，呢套劇的確令家怡又跳咗去另一個level。

而好多《綠豆》粉都同我一樣，對瑪嘉烈、趙子龍同大衛之間嘅愛情好有迷思。結局中瑪嘉烈離開咗大衛之後，又有啲珠絲馬跡掛住大衛，其實瑪嘉烈最後會點揀？「我真心鍾意咗趙子龍，但佢揀咗我個frd Candy，當佢去踢我做所有嘅嘢，其實我仲點樣面對大衛呢？我唔知佢講咗幾多嘢比大衛聽，觀眾亦唔好諗淨係得摩天輪果一晚。當與大衛之間嘅感情跌咗落去嘅時候，突然之間趙子龍又咁樣對我，我再望一望同大衛間屋，我係親手摧毀哂所有嘢，咁就返唔到轉頭。我唔知編劇再寫落去會點樣發展，但在我演瑪嘉烈嘅角度係一定面對唔到大衛！現實中，我唔同瑪嘉烈，唔會一腳搭兩船。三角戀一定唔work，因為你唔會知道個情係點樣分佈。」

除咗瑪嘉烈之外，Jackson都係有老婆又拖住Diamond，不禁問現實中男神又有冇試過呢？「好難㗎，我專一，個人又講唔到大話，而且唔忍心咁樣對兩個女人。」

男神，咁你講過一杯奶茶、一碗雲吞麵就滿足生活嘅比喻？揀女友係咪都係咁呀？「呢個比喻係想講，生活可以過得好簡單，間中去吓旅行、食吓自肋餐都okay嘅。你可以有果啲嘢，但你唔係只係需求呢啲物質嘢，即係你嘅生活永遠環繞住要買幾多個手袋、住咩靚地方、要坐跑車、坐頭等、坐商務、要去巴黎shopping，其實我覺得可以喺另一地方滿足自己，可以讀一本書，睇一套戲，有無限滿足感；如果對方淨係靠物質嘅話，我會覺得相對嚟講比較膚淺。」相信呢啲都係唔少男人嘅心聲，揀啱價值觀相同嘅另一半好緊要。

後記：我相信王宗堯同周家怡都係真香港人，每當講到最近社會發生嘅事，同埋佢哋對電影《導火新聞線》嘅抱負，都會滔滔不絕，眼神堅定。另一方面，相信佢哋都一定拍得好開心，私底下都好frd，訪問中又不時搞吓爛gag輕鬆下，彼此咁有交流，如果下部戲佢哋係同一條感情線，可能會幾有火花喎。

Photography_Vincent C. @ MenClub

Video_Dave @ MenClub

Styling_Hazel Leung

Makeup_Aster Phang

Hair_Hei @ Xenter (王宗堯)

Hair_Vincent Yeung @ Salon Osmosis (周家怡)

Wardrobe: Salvatore Ferragamo, Tom Ford, Swarovski, CHARRIOL