{ SKIP }
文:MenClub Patrick  圖:互聯網
POSTED ON 02 Mar 2015
上年年尾,Samsung推出配備右方單邊曲芒的GALAXY Note Edge,雖然夠晒創新,但被不少人評為「法國大餐」之作,結果......



但係在今朝凌晨於西班牙巴塞隆拿舉行的《Samsung The Next GALAXY》發布會中,世人終於明白Samsung設計這種曲芒的用意,原來「完全體」係屏幕兩邊都會向下呈弧形,令機身變窄兼更貼手。相信往後會有不少新機採用此設計,而頭炮就係這個發布會的主角GALAXY S6 edge,反而事前人人期待的S6,最終淪為發布會的大配角。

其實只要將S6 edge及S6拍埋對比一下,還會發現雙曲芒的另一好處,就係機身靚仔好多!樣靚、好揸手,正係男士的追求,而且這個設計不會被Apple告喇啩?



左:S6、右:S6 edge,係咪S6 edge睇落靚好多呢?



三截芒同一畫面
其實仔細一點睇,S6 edge的機面仍離不開S3至S5的一貫圓角設計,但一將5.1吋屏幕兩邊邊緣整成向下傾斜,整個造型就變得slim得多,靚晒!

不過,它的兩個曲芒不像Note Edge那個能夠獨立運作,三截屏幕只能顯示一個連貫的畫面,雖然Samsung已刻意將部分按鈕搬到介面邊緣,讓用家可在曲芒上面更就手地按這些按鈕,但整體操作仍跟普通手機無異。但在睇片或睇網頁時,邊緣位置的影像或文字看起來會出現變形問題,這點需要用家適應一下。



睇清楚屏幕條邊,弧度都幾勁。


部分按鈕刻意擺喺屏幕右方邊緣,方便用家左手單手揸機時,都能夠用左手食指㩒到。


睇片照舊係full screen,所以畫面上下兩邊邊緣有可能俾折射影響。



靚機背但不能插卡
另一方面,S6 edge的機背設計亦幫到部機加好多分,淨色的機被堅硬的Corning Gorilla Glass 4覆蓋(亦覆蓋了機面),加上折射效果,睇現場實機相的感觀很不錯,至少肯定不會像S5般被譏笑似「膠布」。然而,這設計亦令S6 edge的背蓋變得不能打開,喪失了能夠插microSD卡的優點,應該又會因此得到一些負評。為了彌補這一點,S6 edge的內置儲存空間增加到32至128GB,但相信機價亦會增加不少,各位要有心理準備!



加上反光效果的淨色機背,真係靚過「膠布」S5好多!


鏡頭同iPhone 6一樣有少少凸起,乜咁啱嘅!


就連金屬邊框同嗰兩邊白色間都好似iPhone 6!


鏡頭旁邊除了有補光燈,還有用來偵測白平衡的紅外線感應器。





八核U加2K芒
今次S6 edge的外形確實有驚喜,但改進了的規格及新增功能卻不算很多,最主要係處理器係S5的四核心,變成四加四核心,兼且支援64 bit;屏幕的解像度亦由上代的Full HD,提升至1,440x2,560的2K水平,但尺寸卻維持是5.1吋不變,所以畫面線數大幅增加至577ppi,理論上畫質會細緻得多。有了這些升級,S6 edge方能繼續號稱市場上的頂級旗艦機。



手機上鎖時通知介面的水狀設計幾特別!


畫面升至577ppi線數,用來睇字會更加清晰,但文字在屏幕邊緣出現則會變形,睇落更會細一點。



改良鏡頭兼快速充電
此外,S6 edge的鏡頭跟S5一樣是1,600萬像素,已近乎加無可加,但這次卻透過加入f1.9大光圈、OIS光學防震系統及紅外線偵測白平衡功能去提升相質;而前置鏡頭則由200萬像素增至500萬像素,終於有update了!

其他方面,S6 edge還改良了無線充電功能,不過有幾多人會用呢?好彩,它亦新增了快速有線充電功能,叉得比S5快1.5倍,只需10分鐘就能叉到夠用4個鐘的電量,這功能實用得多!還有,S6 edge也支援新發表的Samsung Pay付款服務,但連Apple Pay都未成氣候,Samsung的同類服務,聽住先啦!



S6 edge及S6同樣會有白、黑及金三色版本,S6 edge再加一款綠色版,S6則另有藍色版。



只要唔係貴太多,㨂硬S6 edge!
最後循例都要講講S6及S6 edge的分別......但其實除了沒有雙曲芒、電量少50mAh、機身大少少及重少少之外(厚度反而薄0.2mm),根本就無分別。不過基於外觀考慮,若然價位不是相距太遠的話,我就一定揀S6 edge喇!(4月10日推出)



正面睇S6,外形跟S5差不多。


左:S6 edge、右:S6。兩機的機底設計同樣好似iPhone 6。



Samsung GALAXY S6、S6 edge規格
售價:待定
系統:Android 5.0
制式:LTE、WCDMA、GSM
屏幕:5.1" 1,440x2,560 Super AMOLED(S6 edge具備雙邊曲面側屏幕)
處理器:四核心2.1GHz+四核心1.5GHz
記憶體:3GB RAM
鏡頭:後置1,600萬像素、前置500萬像素
儲存空間:內置32/64/128GB
電池:內置式2,550mAh(S6)/內置式2,600mAh(S6 edge)
體積:143.4x70.5x6.8mm(S6)/142.1x70.1x7.0mm(S6 edge)
重量:138g(S6)/132g(S6 edge)
顏色:白/黑/金/藍(S6)/綠(S6 edge)
推出日期:4月10日

查詢:Samsung www.samsung.com/hk





自Blue Origin及Virgin Galactic於過去兩年分別成功載人上太空後,「商業太空旅行」就由小說情節,成為現實中可行嘅體驗不過,當然係只限有錢人體驗啦。而睇黎有錢人已經唔滿足於「飛上去望下個地球就落返黎」,而係 ...
tech
【太空】真 ‧ 離地餐廳 400萬上太空 望住地球食米芝蓮
28 Mar 2024
若然消息屬實,iPhone 16 Pro機身側邊將加入一個全新按鍵「Capture button」,大小與電源鍵差唔多,能方便用戶拍攝及錄影。
tech
【科技】疑似iPhone 16 Pro保護殼曝光!機身側邊加入全新「拍攝」按鍵?
27 Mar 2024