今次角川出嘅J Walker SIM係用咗MVNO方式同Docomo合作，4G LTE唔限速同埋向下兼容3G，暫時會率先喺台灣推出，仲計劃會喺香港同大陸推出相同服務。SIM卡同大部份嘅data SIM一樣唔包VoIP通話，而SIM卡就分為7日同11日兩款，分別賣799同1299台幣(約$202同$330港幣)，計返1日都唔使$30。雖然呢張角川卡香港仲未有得用，但市面上有好多日本SIM卡選擇，依家就為大家整理下，等你趁呢排淡季去日本時就用得著。

日本出嘅數主要都係用DoCoMo，事關收得好而且支持4G，上網速度比較快而且冇限制，即係Facebook、YouTube同埋Instagram都全部用到。要留意有部份日本SIM卡需要上網登記個人資料，仲好多時都要手動設定APN，對唔熟手機設定嘅人嚟講就比較難搞。

b-mobile
講到遊日SIM卡，最多人熟悉應該會係b-mobile SIM U300，皆因好多旅遊書都介紹過，但呢張卡要日文官網先買到，就連bic camera同Yodobashi都唔係成日有得賣，而且至煩係一要用日本當地電話先可以開通到。b-mobile亦另有一款專比遊客用嘅visitor版data SIM，可以網上訂完之後寄去機場或者酒店拎卡，但呢款SIM最衰就係會限速。

So-net
本來勁唔抵用嘅So-net，自從由100MB爆升10倍到1GB之後，成為大家遊日嘅搶手SIM卡之一，麻煩在官網冇得買，要去amazon.jp訂完再寄去指定地方。雖然大家亦可以去機場販賣機買卡，但比上網買貴一截。

Bic SIM Japan Travel SIM
呢張外國人限定嘅SIM卡，正在唔使登記又唔使開通，而且就算唔記得咗上網買，都可以去Bic Camera市面買到，而SIM卡同其他牌子一樣可以選擇標準SIM、microSIM同nanoSIM三㮔呎吋，基本上大部份平板或者手機都用到。

T-SIM Prepaid SIM
由日本兼松通訊推出嘅擁有3GB數據量可以話贏晒，而且亦冇3日用起過360MB就會限速嘅問題，而且30日有效期對打算玩足1個月嘅人嚟講真係好抵。另外，訂T-SIM時唔使登記亦免開通，係訂好之後選擇送去指定地址pick up就用得。

Japan LTE Prepaid SIM
差唔多係最平嘅數據卡，15日任用。不過呢張卡每日得100MB上限，用凸咗就會限速跌到落128kbps，就連開whatsapp都好勉強。如果只係上facebook打下卡或者post幾張相的話，應該都夠用。

Prepaid SIM for Japan
價錢平7日期限比較適合短trip玩幾日用，但訂購時間同送貨時間都有限制，大家記得睇清楚。另外，如果選擇機場郵局pick up就要加多200yen，其實計落冇樓上嘅Japan LTE Prepaid SIM咁抵用。